May "K" si Kuh!

Kung kailan pa mayro’n na siyang isang Isabella na sumusunod sa kanyang yapak ay saka naman parang lubhang gumaling si Kuh Ledesma. Walang hindi humanga sa ginawa niyang pagkanta sa launching ng kanyang latest album na released ng Bravo Records.

Tatatlo lamang ang kinanta niya pero sapat na ito para makita ng mga dumalong press ang malaking improvement ng kanyang performance. Kung dati-rati ay nakatayo lamang siya habang kumakanta, ngayon nagsasayaw na siya and she oozes with sex appeal. Napaka-ganda pa ng kanyang see-thru gown na talagang bumagay sa kanyang "bagong" image.

Pinamagatang "K", isang Filipiniana ang album na nagtatampok sa napakagandang mga areglo ni Bob Aves ng mga klasikong awitin nina Nicanor Abelardo ("Pakiusap" & "Nasaan Ka Irog"), Lucio San Pedro ("Ugoy Ng Duyan"), George Canseco ("Siya Na Ba?"), Constancio de Guzman ("Bayan Ko"). Ni-revive din niya ang "Dahil Sa Iyo" (M. Velarde), at "Silayan" (Josefino Cenizal).

Tunay ngang may "K" si Kuh, K as in karakter, kariktan, karapatan pero ang pagbanat niya ng mga awitin na ginawang kontemporaryo ay talaga namang may kagandahan, kabutihan, kariktan at katapatan.

* * *

Akala ko ay busy sa kanyang paghahanda para sa sinalihan niyang Pair-Fect contest para sa Private Property itong si Joy Velasco, yun pala nakapunta na ito’t nakauwi mula sa Singapore na kung saan sumali siya’t nanalo sa Teen Model of the Universe Pageant nung April 4-8. Siya ang naging representative ng Pilipinas.

Mga 20 countries ang sumali dito na bukod sa titulong Teen Model of the Universe ay nakuha rin niya ang titulong Teen Princess Photogenic.

Eighteen years old si Joy at kumakanta rin.

* * *

Ang ganda naman ng bagong promo ng Western Union, ang Piso Padala, na kung saan pwede nang magpadala ng pera ang sinuman sa kanilang mga pamilya saan mang panig ng bansa sa pamamagitan ng domestic money transfer (DMT) na hindi tataas ng P1,000 sa halagang P1.00 o piso lamang per transaction.

Tatakbo ang promo mula Abril 15 hanggang Mayo 31 ng taong ito.

Lahat ng sender at receiver ng money transfer services ay maaring magkaro’n ng Western Union Gold Card na magbibigay sa kanila ng mga benepisyo tulad ng diskwento. Pumunta lamang sa alinmang Western Union Agent location at mag-fill up ng registration form. Libre ang card, wala ring joining o annual fees.

Endorsers ng Western Union Piso Padala promo sina Mariel Rodriguez at Janelle Jamir.

* * *

E-mail: veronicasamio@yahoo.com