Gf ni Richard, di insecure kay Angel

Kapag umatras si Vice-Gov. Ricky Recto sa pagtakbo sa pagka-gobernador ng Batangas para bigyang-daan ang kanyang hipag, maiiwan sa ere ang perennial screen partner ni Mayor Vilma Santos sa pelikula na si Christopher ‘Boyet’ de Leon na siya sanang magiging runningmate ni Vice-Gov. Recto. Malinaw naman na ang banker na si Edwin Ermita, anak ni Exec. Secretary Ermita ang magiging running-mate ni Mayor Vi.

Samantala, malakas naman ang mga bali-balita na malamang daw na umatras sa kanyang kandidatura sa pagka-senador ang actor-director-producer at product endorser na si Cesar Montano at tatakbo na lamang umano sa pagka-gobernador sa Bohol.

* * *

Sa presscon ng Happy Hearts ng Regal Films ay personal na inamin ng aktor na si Wendell Ramos na may tatlo siyang anak na pawang mga panganay.

Sampung taong gulang na ang panganay ni Wendell na si Wendell Saviour at ito’y nasa Amerika kasama ang mother nito. Ang pangalawa naman ay si Dedell Saviour (7) at anak niya sa kanyang ex-wife habang ang bunso na si Tanya ay magpa-five months pa lamang na anak naman niya sa kanyang karelasyon ngayon.

Annulled na ang kasal ni Wendell sa kanyang ex-wife kaya kung nanaisin nitong pakasalan ang kanyang current girlfriend ay walang magiging problema.

Samantala, enjoy si Wendell sa kanyang ginampanang gay role sa Happy Hearts na dinirek ng premyadong director na si Joel Lamangan. Kabituin niya rito sina Rustom Padilla, Jean Garcia, Tirso Cruz III at ang tambalang Shaina Magdayao at Rayver Cruz.

Bakit kaya hindi sinipot ni Rustom Padilla ang general presscon at premiere ng pelikula? May nagsuspetsa tuloy na may samaan sila ng loob ng Regal matriarch na si Mother Lily Monteverde.

* * *

Samantala, hanga kami sa girlfriend ni Richard Gutierrez na si Georgina Wilson dahil kahit kelan ay hindi ito na-insecure sa pagmamahal ni Richard kahit pa ilang beses itong na-link sa kanyang perennial screen partner na si Angel Locsin.

Nung nakaraang Sabado (March 9) ng gabi ay nakita namin sina Richard at Georgina na magkasama sa grand launch ng Philippines’ Next Top Model na ginanap sa Embassy Bar ng Global City. Si Ruffa Gutierrez ang host ng local franchise ng PNTM. Naroon din sina Eddie Gutierrez at Annabelle Rama maging ang twin brother ni Richard na si Raymond.