Katrina, type makapareha ni Cesar

Maswerte si Katrina Halili sa taong ito, dahil lalo pang gumaganda ang kanyang career. Maganda ang regalong natanggap nito sa kanyang kaarawan dahil bukod sa Atlantika ay kasama rin siya sa Lupin, bukod pa sa follow-up movie ng Regal Entertainment matapos ang launching movie nitong Gigil.

Interesado rin si Cesar Montano na kunin siyang leading lady sa susunod nitong proyekto.

Sa kabilang banda, pinabulaanan ni Katrina na may relasyon sila ni Mark Herras. "Magkaibigan lang po kaming dalawa. Kaya siguro kami inili-link sa isa’t isa ay dahil pareho kaming loveless," anang aktres.

Gustong Buhayin Ang That’s

Malaki ang naitulong ni Kuya Germs Moreno sa mga naging alaga niya sa That’s Entertainment kung saan karamihan ay gumawa ng malaking pangalan di lang sa bansa kundi internationally gaya nina Lea Salonga at Billy Crawford. Karamihan din sa mga artistang napasikat nito ay gumanda ang buhay at patuloy pa ring namamayagpag sa showbiz.

Siya ang unang mentor ng mga kabataang hinubog sa pag-arte, pag-awit at pagsayaw bago pa ang StarStruck o mga reality shows sa pagtuklas ng bagong talino.

Gustung-gusto ni Kuya Germs na maibalik ang That’s Entertainment at may offer naman sa ibang channel pero ang loyalty niya ay nasa Siete pa rin. Sana’y magkaroon ng katuparan ang kanyang wish na maipagpatuloy ang That’s Entertainment kung saan hanggang ngayon ay nasa puso pa rin niya ang programa.

Faith, Abala Sa Show

Isa sa mga magagaling na singers na marunong magpahalaga sa mga taong tumutulong sa kanya ay si Faith Cuneta. Pinaunlakan nitong maging guest sa aming Christmas party (Printing) ng Pilipino Star Ngayon.

Hindi rin ito mahirap kausapin para maging guest sa mga okasyon ng iba’t ibang publication na tumutulong sa kanyang singing career.

Kaya naman hindi ito nababakante sa paglabas sa telebisyon at mga shows. May show si Faith sa Teatrino sa January 18 at 25 gayundin sa February 1 at 8.

Nagbigay si Faith ng karangalan sa Pilipinas nang manalo sa World Championship of Performing Arts (gold medalist) pop and original category na idinaos sa Hollywood at naging Aliw Award Best Female Performer in a Concert.

Blind Item: Aktres, Sinugod Ang Babae Ng Kanyang Mister?

Gaano katotoo ang balita na ayaw nang makipagmabutihan pa ng isang celebrity sa kasamahang actor/singer dahil sa takot sa dating asawa nito.

Ang dahilan daw ay sinugod ito ng matapang na misis at ang payo nito sa comedian/singer na huwag papatol sa mister niya dahil baka sugurin siya ni misis na aktibo pa rin sa showbiz. May seksing baguhang celebrity na naman ang inaasinta ngayon ng actor-singer.