Cogie, may shopping mall na!

Sa katotohanan, ang ama ni Cogie Domingo na si Atty. Rod Domingo ang tunay na nagmeme-ari ng One Greenhills Shopping Plaza na matatagpuan sa Greenhills, sa junction ng Eisenhower at Annapolis Sts., katabi ng OB Montessori School. At dito naman sa atin, kapag isa sa mga magulang ang nagmemeari ng isang lugar o negosyo, sa buong pamilya na ito.

Sa kaso ng One Greenhills Shopping Plaza, may mga ka-partners si Atty. Domingo na tumulong para maitayo niya ang nasabing shopping mall na pinakabago sa Greenhills na pinaghalo ang comfort at convenience ng isang shopping mall na mas mababa ang presyo at may ambience ng isang tiangge. Variety ang goods na mabibili rito, mula RTW hanggang electronics, personal accessories at home decor.

Magi-invest si Cogie ng kanyang kinikita sa isang stall na magtitinda ng car accessories. "Mahilig kasi ako sa gadgets ng kotse," sabi ng batang aktor na bukod sa paglabas sa Bakekang ng GMA7 ay may gagawin ding pelikula para sa GMA Films para sa Valentine’s Day.

Hindi na bago si Atty. Domingo sa negosyo ng pagtitinda. Ang mga grandparents ni Cogie ay dating may grocery sa Sampaloc na kung saan sila tumira. Nagtatakal ito ng bigas tuwing hapon. At bagaman at isa na itong matagumpay na abogado, hindi nito nakalimutan ang kanyang humble beginnings.

Bukod sa mga goods, magbibigay din ng service ang One Greenhills Shopping Plaza. Sa fourth floor rito, magkakaro’n ng beauty salon, full service spa at medical clinics. Matatagpuan din dito ang isang exclusive na parking area na kung saan ang mga sasakyan ay dadalhin ng elevators sa exclusive parking area, ATM machines, mga restrooms. Lahat ng palapag ay lalagyan ng fire escapes, ang kahalagahan nito ay nalaman ni Atty. Domingo dahil siya ang naging prosecutor sa Ozone disco fire case.

* * *

Sa halip na matuwa dahil ipinamamarali ni Geneva Cruz sa radyo na siya ang nakauna rito, nagagalit si Keempee de Leon dahil hindi niya alam kung bakit ito ginagawa ni Geneva.

"Ba’t kailangan niyang ipagsabi ito, at di ko sasagutin kung totoo man ito o hindi. Basta ang masasabi ko, isang grupo kami nun na medyo nagkatuwaan at uminom. Kasama namin sina Dessa, Lloyd Umali at may iba pa," anang aktor na kasama muli ang kanyang dating ka-loveteam at naging girlfriend in real life na si Manilyn Reyes sa LRT 2 episode ng Shake, Rattle & Roll 8 sa direksyon ni Mike Tuviera.

May 2 pang ibang episode ang SRR8, ang 13th Floor ni Rahyan Carlos starring Bearwin Meily, Keanna Reeves, Joseph Bitangcol, Roxanne Guinoo, Janus del Prado at marami pang iba at Yaya ni Topel Lee na tampok naman sina Iza Calzado, Sheryl Cruz, TJ Trinidad, Boom Antonio, Debraliz at Nene Tamayo.

Going back to Keempee, sinabi nito na ayaw niyang masira ang friendship nila ni DJ Mo na kung saang programa nagsisimula ang lahat ng mga hindi magagandang balita tungkol sa kanilang mga artista.

"Nakakahiya rin kay KC Montero. "Kahit wala itong sinasabi kapag nagkikita kami at pogi points para sa akin yun mga sinabi ni Geneva, still hindi magandang gimik yun kung sakali mang isang gimik yun at kung biro naman, masamang biro yun para sa akin," dagdag pa ni Keempee. — Veronica Samio