Jolens, nag-sorry sa GMA!

Siguro dahil wala naman siyang masamang intensyon na tapatan o kaya ay kalabanin ang GMA7 na kung saan ay ilang taon na siyang Kapuso kung kaya matapos siyang mag-sorry dahil lumabas siya sa The Buzz nang hindi nagpapaalam sa management ay agad naman siyang pinatawad.

"Hindi ko na naisip na hindi magiging maganda ang pagtanggap ng marami sa ginawa kong paglabas sa ABS CBN, matagal na akong iniimbita ni Kuya Boy (Abunda), sa Europe pa lamang pero hindi umuubra dahil nga sa sked ko kaya nang magkaro’n ng chance, agad akong pumayag.

"Wala naman akong negative feeling pero, tinatanggap ko na sana nga nagpaalam muna ako pero, siguro nalito lang ako kaya nalimutan ko, thankful naman ako na naintindihan ako ng GMA," ani Jolens na maganda sa kanyang bagong haircut. "Matagal na rin itong plano, ngayon lang nagkaro’n ng katuparan. Kailangan ko ito, para maiba naman ang looks ko, para hindi magsawa ang tao," dagdag pa ng artista na pagkadating mula sa kanyang matagumpay na concert sa Europe, ay tumanggap ng Serviam Award mula sa Catholic Mass Media Awards. Ibinibigay ito sa isang tao na malaki ang naitutulong sa mga less fortunate.

* * *

May gaganaping Bingo with the Stars ang Worldbex Services International ngayon sa World Trade Center.

Dadaluhan ito ng mga celebrities tulad nina Ciara Sotto, Angelica Jones, Kathleen Hermosa, Jerome Abalos, Katherine de Castro Franzen Fajardo, Roxanne Guinoo, Neri Naig, Aaron Villaflor at Mich Dulce.

Ang kikitain mula dito ay mapupunta sa Phil. Binondo Volunteers Brigade.

Para sa ibang detalye, tumawag sa 5316350/5316374 at hanapin si Armand Bernardino.

* * *

Dahilan sa tagumpay ng kanyang "Wish I Was Making Love (To You Tonight)" na mula sa kanyang bossa nova flavored album na "The Island", maraming offers para kumanta si Agot Isidro, at pinayagan naman siya ng kanyang mister na si Manu Sandejas.

Isa sa mga offers ay isang dalawang gabing concert sa Music Museum, Disyembre 14 at 15, na pinamagatang Back To Basics. Magiging isang magagandang pagkakataon ito para kay Agot na muling balikan ang isang bagay na mahal niya, ang pagkanta. Makakasama niya ang The Company sa unang gabi at ang The New Minstrels sa pangalawang gabi. Ipakikilala rin sa kanyang concert si Shawn David, bagong artist ng Holiday Records at United Multiart Prods. Inc..

* * *

Isang album ang inilabas ng Star Records bilang selebrasyon ng birthday ni Sheryn Regis. Pinamagatang "Modern Jukebox Collection", naglalaman ito ng mga cover songs ni Leah Navarro ("Ang Pag-ibig Kong Ito", na carrier single ng album), Joey Albert ("I Remember the Boy"), Vina Morales ("Alam Mo Ba?"), Manilyn Reynes ("Sayang Na Sayang") at Linda Eder ("After All").

Meron din itong mga komposisyon nina Vehnee Saturno ("Di Na Babalik Pa"), Larry Hermoso ("Bakit Iniwan Mo"), Barbie Dumlao ("Bago Magbukas"), Ricky Sanchez ("Ang Lahat Para Sa ‘Yo") at ang sariling komposisyon ni Sheryn na "Pusong Lito".

* * *

Isang non-stop early Christmas party ang matutunghayan ngayong tanghali sa SOP dahil ilulunsad ng nag-iisang Concert TV ang Syete Para sa Pasko, a walk to Christmas countdown na naglalayong magbigay ng isang mas makabuluhang pagdiriwang ng Pasko at ang SOP Telebabad Pasasalamat Fans Day! makasama ang lahat ng cast ng top rating Kapuso shows (Captain Barbell, Atlantika at Bakekang).

* * *

[email protected]