Paano na si Angelica, may girlfriend pala si Derek?!

Ginawa nang once-a-month ang dating weekly TV program nina Paolo Bediones at Miriam Quiambao na Pinoy Meets World pero hindi dapat malungkot ang mga tagasubaybay ng dating Miss Universe 1st runner-up dahil bukod sa Pinoy Meets World ay linggu-linggo naman siyang napapanood sa bagong public affairs program ng GMA Network, ang Palaban kung saan niya kasama sina Winnie Monsod at si Malou Mangahas, isa sa mga nagtatag ng Philippine Center for Investigative Journalism. Ang programa ay nag-pilot nung nakaraang November 8, Miyerkules pagkatapos ng Saksi nina Arnold Clavio at Vicky Morales.

Simula naman sa November 26 (Linggo) 11NG sa QTV-11 ay mapapanood din si Miriam sa isang weekly drama anthology na pinamagatang Dahil Sa Iyong Paglisan... Pamilyang OFW na tumatalakay sa buhay ng mga OFW (Overseas Filipino Workers). Ang nasabing programa ay magkatulong na pinamamahalaan nina Gina Alajar at TV at theater director/actor na si Soxy Topacio na isa rin sa mga tumatayong producers ng Segments & Clips, Inc. kasama ang kanyang mga business partners na sina Phil Noble at Jojo Sanchez.

Ang unang episode ng Dahil Sa Iyong Paglisan..Pamilyang OFW ay pinamagatang Barakong Maybahay na tinatampukan nina Alfred Vargas, Christian Vasquez, John Feir Bellyflory. Ang pangalawang episode ay pinamagatang Pintor, Japan na kung saan naman tampok na mga bituin sina Ana Capri, Goyong, January ‘Lumeng" Isaac at Renz Valerio. Ang pangatlong episode ay pinamagatang Cook, Beirut kung saan naman featured sina Bing Loyzaga, Nonie Buencamino, Sheena Halili at Gigette Reyes.

* * *

Isinulat ni Dolly Anne Carvajal sa kanyang column na may Fil-French girlfriend umano ang commercial model-actor na si Derek Ramsey na nagngangalang Solen na isa ring modelo. Nali-link ngayon si Derek sa pangunahing bituin ng Pitong Dalagita na si Angelica Panganiban at aminado ang young star na mahalaga umano sa kanya si Derek kahit wala pang tahasang pag-amin na nagmumula sa kanilang dalawa tungkol sa kanilang relasyon.

Kung totoong may current gf ngayon si Derek tapos sila rin ni Angelica, puwede siyang taguriang two-timer. Kawawa naman si Angelica kapag nagkataon at ganoon din ang kanyang totoong girlfriend na si Solen.

Isa ring eyewitness ang nagsabi na hindi umano sumunod si Derek sa Borocay nung October 31 kundi magkasabay umano sina Angelica at Derek na nagtungo roon.

Hindi pa man gaanong naghihilom ang sakit na dulot ng paghihiwalay nina Angelica at boyfriend nitong si Carlo Aquino, mukhang maagang madi-diskarel ang bubot pang relasyon nila ni Derek kung meron man.

* * *

<a_amoyo@pimsi.net>