Katrina, tinototoo na si Sandara!

Naisip na siguro ni Katrina Halili na walang mangyayari kung mapipikon siya sa tsismis na gusto niya si Sandara Park kaya, sinasakyan na lang nito ang panunukso ng press. Sa pictorial ng SuperNoypi, tinawag nitong "Darling" ang Koreana sa harap ng press na ipinag-blush nito.

Noong Linggo, nagkita naman sina Katrina at Joseph Bitangcol sa Regal Valencia. May cast pictorial ang Shake, Ratlle & Roll 8 kung saan, kasama sa 13th Floor episode ang bf ni Sandara at may interview naman sa mga taga-SN.

Marami rin ang nakarinig nang pagsabihan ni Katrina si Joseph na ‘wag paiiyakin si Sandara at kung gagawin niya yun, sasapakin niya ito. Humirit pa ang sexy actress na ‘pag iniwan niya ang gf, sa kanya (kay Katrina) na lang si Sandara.

Natawa lang si Joseph dahil alam na nagbibiro ang bida ng Gigil. First time nakita ng personal ng young actor si Katrina at naseksihan siya rito. Ganda ng katawan daw ang unang mapapansin sa dalaga at dagdag na sex appeal ang pagiging kalog. Hindi kaya si Katrina naman ang pagselosan ni Sandara dahil pinuri ng boyfriend?

* * *

Malapit nang magwakas ang Now & Forever (Dangal) na isa sa bida si Dennis Trillo pero, ‘di siya mami-miss ng kanyang fans dahil malapit na siyang magbalik sa telebabad block ng GMA-7. Abangan n’yo na lang kung ano ito’t bawal pang sabihin.

May free time na palang mag-concert at mag-recording ng kanyang album sa Indi Music si Dennis dahil tapos na ang taping niya ng N&F.

Bukas, November 17, may concert siya sa Zirkoh, Angeles City billed Maiba Naman. Guests nito sina Gladys Guevarra, Teri Onor, Marian Rivera, Freemale Dancers at si Kyla.

Gusto na rin ni Regine Velasquez na by December, tapos na ang album ni Dennis para ma-release sa January next year. Ang pictorial for the album cover ay naka-set sa last week of this month. Kumuha naman ng voice coach ang actor para mag-guide sa kanya sa recording.

Nakarating din sa aming close ngayon sina Dennis at Oyo Sotto. Magkasundo ang dalawa’t halos pareho ng ugali at hilig. ‘Pag nagkikita, ang pinag-uusapan ay latest gadgets at toys. Matutuwa nito si Angel Locsin dahil close ang boyfriend at favorite leading man niya.

* * *

Magaling na nga si Frenchie Dy at kaya nang mag-concert. Billed This Time I Am Sweeter ang concert nito sa November 30 sa Zirkoh Comedy Bar sa Timog. Guests niya sina Angelika dela Cruz, Erik Santos at ang Overload Band. Tickets are at P500. — Nitz Miralles