May unawaan na sina Angelica at Derek?

Tila mala-rosas na naman ang paligid ng young star na si Angelica Panganiban, ang pangunahing bida sa pelikulang Pitong Dalagita ng Canary Films. Bukod kasi sa magandang takbo ng kanyang career, may bago na namang nagpapatibok ng kanyang puso ngayon, ang model-turned actor na si Derek Ramsey. 

Nung nakaraang Linggo sa The Buzz, sinabi ni Angelica na priority umano sa kanya ngayon si Derek.  Indirectly, may unawaan na silang dalawa na co-star din niya sa MMFF entry ng Canary Films, ang Matakot Ka sa Karma na mula sa panulat at direksyon ni Jose Javier Reyes.

* * *

Nawala man sa ere ang Pinoy Meets World nina Paolo Bediones at Miriam Quiambao, balik-TV si Miriam dahil siya ang host ng bagong programang pinamagatang Dahil sa Iyong Paglisan (Pamilyang OFW), isang weekly drama anthology na nagsasalarawan ng nagiging buhay ng mga Filipino Overseas Workers. Ito’y pinamamahalaan nina Gina Alajar at Soxy Topacio bilang directors at produced ng bagong tatag na produksyon, ang Segments & Clips, Inc. ng magbi-business partners na sina Soxy Topacio, Phil Noble at Jojo Sanchez.

Ang Dahil Sa Iyong Paglisan (Pamilyang OFW) ni Miriam ay magsisimulang mapanood sa darating na November 26 (Linggo) 11NG sa QTV.

* * *

Masayang ibinalita sa amin ni Kuya Germs (Moreno) na magdiriwang ng ika-isang anibersaryo sa darating na Nobyembre 30 (Huwebes) 5NH ang Walk of Fame sa Libis.  Bukod sa entertainment numbers na inihanda, magkakaroon ng 28 na karagdagang pangalan sa naunang 44 ng mga kilalang personalidad sa larangan ng cinema.

Ang mga bagong pangalan na madadagdag ay sina Mona Lisa, Paraluman, Chiquito, Judy Ann Santos, Alicia Vergel, Cesar Ramirez, Romeo Vasquez, Aga Muhlach, Jaime dela Rosa, Lito Lapid, Edna Luna, Lorna Tolentino, Maricel Soriano, Cesar Montano, Jinggoy Estrada, Robin Padilla, Vic Vargas, Bong Revilla, Lea Salonga, Eddie Gutierrez, Rudy Fernandez, Zaldy Zshornack, Tessie Quintana, Richard Gomez, Phillip Salvador, Gloria Diaz, Marlene Dauden at Manuel Conde. — ASTER AMOYO