Bianca, Say, support lang sa launching movie ni Katrina

Balik Gigil ang title ng launching movie ni Katrina Halili sa Regal at hindi na ito papalitan hanggang sa showing nito sa November 22. Solo launching movie na rin niya ito at ‘di na niya ka-share sina Bianca King at Say Alonzo na malinaw na supporting lang niya.

Iyon nga lang, kinakabahan at napi-pressure si Katrina at kailangang kumita ito dahil pangalan niya ang nakataya. Bukod sa kanyang kaseksihan, isa pang rason kung bakit panonoorin ito sa showing sa November 22 ay ang passionate love scene nila ni Alfred Vargas. Ibinuking ni direk Jun Lana na ‘di nagpaawat ang dalawa sa kanilang halikan. Ang alibi nina Katrina at Alfred ay ginawa lang nila ang kanilang trabaho.

Nabanggit din ni Katrina na naiilang siyang i-promote ang pelikula dahil sa title nito’t baka akalain ng tao na bold ang kanyang ginawa. Pero, nagbago ang isip nito nang mapanood ang trailer dahil wala siyang kahalayang ginawa at matatawa pa nga sa kanya ang moviegoers.

Tungkol sa passionate kissing scene nila ni Alfred, kaya nagmukhang marami dahil inulit-ulit ni direk Jun Lana at sa different angles kinunan. Nahihiya man, ginawa niya ang eksena’t ayaw masabihang nag-iinarte siya.

* * *

Wala ang name ni Marvin Agustin sa billing sa poster ng Wag Kang Lilingon. Wala rin siya sa presscon at inisip tuloy ng press na baka kaya hindi siya pinapunta dahil lumipat na siya sa GMA-7. Pero, walang dapat ipag-react ang actor dahil sa paliwanag ng representative ng Viva Films, focus kina Anne Curtis at Kristine Hermosa, Ricky Lee (scriptwriter) at directors Jerry Sineneng at Quark Henares ang initial presscon.

Saka, sample lang daw ang naka-display na poster ng movie sa presscon. Sa actual poster, above the title at solo ang name niya after Cherry Pie Picache at ang dalawang bida. Binigyan daw nila ng importansya si Marvin.

Sayang pa rin na wala sa presscon si Marvin dahil nag-react pa naman si Kristine sa sinabi diumano nitong ni Pauleen Luna ang actor na unang nanligaw (o naging boyfriend niya). Maganda sana kung after Kristine, si Marvin naman ang nahingan ng comment sa isyung ito.

* * *

Pinangatawanan ni Richard Gutierrez ang pagtatanggol sa mga kapatid lalo na si Raymond Gutierrez na feeling niya’y inapi nina KC Montero at JayR nang sabihang gay. Kinausap daw nito ang dalawa nang makita sa GMA-7 last week pero, walang makapagsabi kung ano ang sinabi. Nagpahayag na lang si JayR na ‘di muna siya magi-guest sa show ni Raymond sa QTV 11.

Isa pang tiyak na magre-react ay si Nina dahil ang music video niya ng "I Do" ang napili ni KC na horrible music video na kanyang napanood. Tiyak na pati ang boyfriend nitong si Nyoy Volante ay ‘di magugustuhan ang sinabi ni KC lalo’t VJ siya ng MTV.

Tinarayan din nito ang MYMP at Bloomfields dahil wala raw original na kinanta pati ang Rocksteddy ay ‘di rin niya type. Any reaction from them?

* * *

Paalala sa viewers ng Atlantika, siguraduhin n’yong mapapanood ang episode this Tuesday and tomorrow para ‘di kayo maligaw sa pagsubaybay sa istorya nito.

Dinala ni Aquano si Elisa sa Atlantika at buburahin ang alaala nito at ipapakilala ni Barracud na si Amaya. Sina Amaya at Ruana nama’y napunta sa lupa at wala ring maalala kaya nang makita ni Remedios (Cherry Pie Picache) ang anak sa bahay ampunan, ‘di siya nakilala.

Lalabas na rin si Rudy Fernandez sa role ni Camaro na magtatanggol kay Aquano at magsasanay dito.