Alfred, binasted ni Diana!

Kung hindi dahil sa lie detector test na ginamit sa Hokus Pokus na may iba nang title HP, Ibang Level Na To ay di mabubuking ang ilang sikreto ni Alfred Vargas gaya ng panliligaw nun kay Diana Zubiri kung saan nabasted pala ito ng dalaga.

Natuklasan din sa lie detector test na totoong mag-on na sila ni LJ Reyes na guest din sa Hokus Pokus at kitang-kita naman kung gaano sila ka-sweet sa isa’t isa. Laging nakaakbay ito sa magandang aktres at lagi ding nagtititigan.

Alessandra, Ayaw Nang Makipag-Usap Kay Jennylyn!

Nagkabalikan na sina Alessandra de Rossi at Jeremy Marquez pero ayaw pa rin ng aktres na makausap si Jennylyn Mercado.

Hindi niya alam kung kailan niya babatiin si Jenny basta’t naroon pa rin ang sakit nang maiugnay ito sa hiwalayan nila ni Jeremy nun.

Nag-Artista Dahil Sa Ama

Nalulungkot si Angel Locsin dahil hindi nagkaroon ng katuparan ang kanyang pangarap na makakitang muli ang ama. Hindi umubra ang stem cell replacement sa mga mata ng kanyang daddy.

"Kaya nga ako nag-artista ay dahil gusto kong makapag-ipon ng pera para sa kanya. Gusto kong makakita siyang muli. Sinabi kasi ni Daddy na sana bago siya mamatay ay makita niya ang kagandahan ng paligid," ani Angel.

Glaiza, Mabait Na Anak

Nakausap namin ang ina ni Glaiza de Castro na si Mommy Cristy at sinabi nito kung gaano rin kabait ng kanyang anak.

"Talagang nagpilit si Glaiza na mag-artista dahil gusto niyang kumita at makapag-ipon ng pera para matulungan ang pamilya. Kasi sa Valenzuela kami nakatira at kapag bumabaha ay nahihirapan kaming lumuwas, lalo na kapag may shooting o taping ang aking anak. Ang layo pa ng iniikutan ng aming sasakyan para lang makaiwas sa baha. Gusto ni Glaiza na makabili ng condo na nasa bandang Quezon City para mailipat ang pamilya," anang Mommy Cristy.

Pursigido si Glaiza na mag-ipon at good karma naman ito dahil sunud-sunod ang kanyang proyekto ngayon.

Nasa Market Na Ang CD Lite

Naibalita ni Nelia Lim na excited ang kanyang alagang si Marri Nallos "The Crystal Voice of Asia" dahil ang kanyang CD lite album ay nasa market na distributed under Sony-BMG Records. Ang kanyang carrier single na "Mahal Naman Kita" na kinompose ni Marizen Yanesa ay inaasahang magiging hit song. Maganda rin ang duet nila ni Juan Rodrigo na revival ng "Imagine" ni Paul Anka na nakapaloob din sa album.

Kagagaling lang ni Marri ng London at magiging abala na ito sa promosyon ng kanyang album.