Bakekang, nasulot ni Sunshine kay Sheryl

Si Sheryl Cruz ang nabalitang magbibida sa Bakekang, isa sa bagong teleserye ng GMA-7 pero, mali ang nasulat dahil si Sunshine Dizon ang napili ng network na magbida nito. Ipinatawag na ito last week at personal na sinabi sa kanya ang magandang balita at dahil sa tuwa’y napaiyak ang young actress. Naniniwala ang nag-back up sa kanyang kayang-kaya nitong gampanan ang role ng isa pang character na nilikha sa komiks ni Carlo J. Caparas.

Last week ng July o first week ng August ang taping ng Bakekang na sabi’y magkatulong na ididirek nina Gil Tejada at Khryss Adalia. Deserving si Sunshine sa big break na ibinigay sa kanya at dahil sa bagong project, malamang alisin na siya sa Captain Barbell.

Kasama sa cast si Sheryl pero, ‘di pa namin alam ang role. May pagbabago rin sa ibang pangalan ng mga artistang nasulat na kasali sa teleserye at saka na namin isusulat ang tungkol dito ‘pag kumpirmado na.

Si Wendell Ramos daw ang makakapareha ni Sunshine at ‘di na sila maiilang dahil magkasama sila sa Bahay Mo Ba ‘To.

Sana sa presscon, kasamang haharap sa press si Carlo Caparas. Aalamin lang namin kung totoo ang tsikang bukod sa talent fee, bibigyan din siya ng time slot sa QTV 11 kapalit nang pagbibigay niya sa Bakekang sa Ch. 7.

* * *

Dumalo sa birthday party ni Ricky Calderon last Friday, July 14 sa Music 21 sina Alfred Vargas at LJ Reyes. Naunang dumating ang actor dahil may rehearsal pa sa SOP si LJ at habang wala pa ito, panay ang tawag at text sa kanya ni Alfred.

Tinukso sila ng press dahil pagdating ni LJ, agad nagbeso-beso. Sayang at ‘di narinig ng dalaga ang sunud-sunod na pagkanta ng love songs ni Alfred pero, nag-duet sila sa "When I Met You." Ang hula namin, theme song nila ang kanta ng APO dahil nag-emote sila habang kumakanta’t panay ang titigan.

Kundi pa on, obvious na may MU na ang dalawa sa nakita naming kilos nila. Naloka si LJ nang hanapan namin ng singsing at para saan daw ‘yun at ang green Ann Taylor bag na pasalubong sa kanya ng actor. Kitang proud sa kanya si Alfred dahil nang may magtanong kung saan nag-aaral si LJ, sinabing freshman sa La Salle.

Tinakot si LJ ng press na siya ang sunod kina Jackie Rice at Iwa Moto na isususpendi ng GMA-7 dahil sa pagkaka-link kay Alfred, baka masira ang loveteam nila ni Mike Tan. Ang sagot, iba ang trabaho sa personal. Ibinalita na tuloy nitong sila ni Mike ang magkaka-tuluyan sa I Luv NY dahil babalik ng ‘Pinas ang binata’t makikita siya. Mai-in love si Jero (Mike) kay Ponyang (LJ) na isang tomboy.

* * *

Sobrang matutuwa nito si Kechup Eusebio dahil yung best supporting actor nomination niya sa Urian para sa pelikulang Sa Aking Pagkagising Mula sa Kamulatan ay nasundan. Nominated din siya in the same category and same movie sa 3rd Golden Screen Awards for Movies na gagawin sometime in August sa AFP Theater.

Nang makausap sa presscon ng White Lady ng Regal, ang nomination pa lang sa Urian ang alam nito. Excited at kinakabahan na ito’t ‘di alam ang gagawin dahil first acting nomination at kahit ‘di manalo’y masaya na siya. Madodoble ang pagka-ngarag nito’t dalawa na ang acting nomination sa pelikulang lagi siyang nagmumura.

Sa White Lady naman, isa siya sa mang-aapi kay Angelica Panganiban at siya rin ang unang matsutsugi sa magkakabarkada.

Sa July 19 na ang showing nito at bukas July 18, Red Carpet premiere sa SM Megamall.

* * *

This week sa I Luv NY, balik-Pinas na si Polly (Jolina Magdangal) at pagod sa paghahanap ng trabaho. Napasok siya sa shop ni Chichi Larue pero, naalis din dahil minaliit ng owner ng shop. Suwerteng nagkita sila ni aling Ester (Tia Pusit) na nagnakaw ng inipon niyang dollars sa New York at magsososyo at magtatayo ng I Luv NY shop. Sa linggo ring ito magkikitang muli sina Polly at Albert (Marvin Agustin) na bumalik ng bansa.

Umalis naman sina Natalie (Jennylyn Mercado) at Baste (Mark Herras) sa bahay ng huli pero, bumalik din. Nakita ni Natalie na kahit mahirap ay nagmamahalan ang pamilya nina Baste kaya lang, problema nila na ‘di makahanap ng trabaho si Baste at darating ang tatay ni Natalie na si Edward (Tirso Cruz III) para bawiin ang anak.