Captain Barbell, kailangan ng leading lady

Kung mother role ang ginampanan ni Dawn Zulueta sa telefantasya na Encantadia na magtatapos na sa buwang ito, mother role din ang kanyang gagampanan sa bagong season ng Now and Forever na pinamagatang Duyan na tatampukan din nina Ariel Rivera, Emilio Garcia, Ella Guevara at iba pa.

Sa Davao na naka-base si Dawn kasama ang kanyang asawang si Anton Lagdameo at first baby nila.  

* * *

Kung katapangan na maituturing ang ginawang pag-amin publicly ni Rustom Padilla sa kanyang totoong gender, wala ring takot na ipinagtapat ng dating beauty queen-turned actress na si Pilar Pilapil nang ilabas nito ang kanyang sinulat na libro tungkol sa kanyang sarili na pinamagatang The Woman without a Face.

Kung naging rebelasyon ang ginawang pag-amin ni Rustom na siya’y gay, mas nakaka-shock na mga rebelasyon ang inilahad ni Pilar tungkol sa kanyang sarili at sa kanyang mga karanasan mula sa kanyang pagkabata. Maraming lihim si Pilar sa kanyang buhay na kanyang  buong tapang na ibinunyag.

Balik-Cebu nga si Pilar kapiling ang kanyang asawang pastor  na nagngangalang Bernie.

* * *

Dumayo ng Davao ang buong tropa ng Bahay Mo Ba ‘To para sa special summer episode ng programa. Kung saan ispesyal na panauhin ang sexy star na si Anna Leah Javier.

Ang Bahay Mo Ba ‘To ay napapanood tuwing Martes ng gabi sa GMA-7. Ito’y tinatampukan din nina Tessie Tomas, Wendell Ramos, Gladys Reyes, Sherilyn Reyes, Michael ‘Pekto’ Nacua, Keempe de Leon, Sunshine Dizon, Dino Guevarra at iba pa mula sa direksiyon ni Al Quinn.

* * *

Anumang araw sa buwang ito ay magsisimula nang mag-taping si Richard Gutierrez ng kanyang bagong fantaserye na Captain Barbell kaya naman regular ang kanyang pagbisita sa gym para maging maganda ang built ng kanyang katawan.

Ayaw pa ring ihayag kung sino ang makakapareha ni Richard sa bago niyang TV series pero may ilang pangalan na ring pinagpipilian.

Kung ang mommy lamang ni Richard na si Annabelle Rama ang masusunod, gusto nitong maging kapareha ng kanyang binata ang ex-girlfriend nitong si Anne Curtis pero nasa kabila na itong istasyon. 

Pero kung gugustuhin ng GMA ay posible pa rin ito dahil si Veronique del Rosario ng Viva naman ang manager ni Anne at hindi ang ABS-CBN at wala ring bagong programang pinagkakaabalahan ang dalaga.

* * *

Tiyak na mapapawi na ang pananabik ni Polo Ravales sa kanyang special someone na si Ara Mina na pabalik na sa linggong ito galing sa isang buwang concert tour sa Amerika kasama sina Jessa Zaragoza at Marissa Sanchez.

Although sinabi ni Ara na wala umano silang commitment sa ngayon ni Polo, itinuturing niya ang binata na siyang pinakamalapit sa kanyang puso ngayon.

Kung may Polo si Ara, may Mark Lapid naman ang nakababatang kapatid ni Ara na si Cristine Reyes. 

Sa pagbabalik ni Ara ay ipagpapatuloy niya ang promo ng kanyang pinakabagong album, ang "araminamovingon" sa ilalim ng BMG Records.

* * *

E-mail: a_amoyo@pimsi.net