Jopay, Alex, mawawala na sa ‘Encantadia’

Patuloy ang bangayan nina Roxanne Barcelo at Rico Robles kahit pareho na silang nasa labas ng Bahay ni Kuya. Ang feeling nga namin, mas lumala ang kanilang conflict na walang camera na nakatutok sa kanila.

May six month contract sa ABS-CBN si Rico at si Roxanne, ang Star Magic na ang nagma-manage ng career niya. Lagi sana silang pagsamahin sa mga show para lagi silang nagkikita’t pareho silang magdusa.

* * *

Nagulat si LJ Reyes sa mga nasulat na sa taping ng Encantadia sila nagka-developan ni Alfred Vargas. Paano nga naman nangyari ‘yun eh, wala siya sa cast ng tele-fantasy ng GMA-7 at hindi siya papasok? Kaya unfair ang mga nang-ookray na nagsasabing ‘di siya bagay sa role ng older Cassandra dahil ‘di naman talaga siya mapapabilang sa show.

Nag-deny na sina LJ at Alfred sa tsismis sa kanila. Sabi ni Alfred, isang non-showbiz college girl ang dini-date niya at si LJ nama’y sa studies at career ang focus. Pero, patuloy ang tsismis at may mga binabanggit pang patunay sa amin.

Incidentally, excited at kinakabahan si LJ to be working with director Joel Lamangan sa pelikulang Manay Po. Ayaw na ayaw ng director ng mga nali-late at nag-promise itong laging darating on time. Gagampanan ni LJ ang role ni Gina, girlfriend ni Marky (Mike Tan).

* * *

Tama ang source namin na sina Juvila (Jopay Paguia) at Andora (Alessandra de Rossi) ang unang mawawala sa cast ng Encantadia. May susunod pa sa kanila at abangan n’yo kung sino sila.

Hanggang April 28 na lang sa ere ang kung tawagin ni director Mark Reyes ay Great Dame of Tele-fantasy at kung umabot pa ito sa May 2, eksaktong isang taon na ito sa ere. Hindi na nga bothered ang director at cast ‘pag bumababa ang rating nila at minsan, natatalo nang katapat na Sa Piling Mo nina Judy Ann Santos at Piolo Pascual. Masaya sila sa rating nito na minsan, pumapalo pa ng 30%. Last Monday nga, umabot sa 35.1% ang rating at mas mataas pa sa pilot ng Majika na nakakuha ng 34.%. -NITZ MIRALLES