Ayaw i-reveal kung gaano katagal ang relasyon

Ayaw ipaalam ni Sandara Park kung gaano na katagal ang relasyon nila ni Joseph Bitangcol dahil private matters daw ito. Hindi nito alam na itsinika ng ina ng nobyo sa kausap na reporter sa presscon ng D’ Lucky Ones na more than one year na sila. Tanggap din ng ina ng young actor ang girlfriend sa kanilang pamilya.

Naikuwento rin ni Mrs. Bitangcol na hindi nagbabayad ng barbecue si Sandara sa kanila. Sana, alagaan na rin nila si Sandy at ipaalalang dagdagan ang food intake dahil 87 lbs. lang ito ngayon at papayat pa ‘pag kainitan niya ng promo ng movie nila.

Sa harap namin ito kumain at magana naman at pati nga turon kumain pero, kulang pa rin para siya’y tumaba. Pero, ipinagmalaki nito ang pagtu-two-piece niya sa Star Cinema movie. Kung gusto raw nating makita ang kanyang katawan, panoorin ang pelikula na showing starting April 15 sa direksyon ni Wenn Deramas.

* * *

Kahit bida na sa Young at Heart episode ng Season 10 ng Love to Love, kasama sina Jackie Rice, Iwa Moto at Marky Cielo, hindi pa rin nararamdaman ni Gian Carlos na artista na siya. Para raw gumagawa pa rin sila ng challenge sa StarStruck 3 at pagod pa rin siya’t ‘di pa nakakabawi ng lakas.

Hindi pa rin nakakauwi sa kanila sa Iloilo ang bagets mula sa Final Judgment pero, umaasang makakauwi bago mag-March 31 para sa kanyang high school graduation. Babalik din siya agad para ipagpatuloy ang taping ng kanyang first regular TV show sa GMA-7 sa direksyon ni Dominic Zapata.

Open na si Gian na pag-usapan ang shortlived relationship nila ni Megan Young. Nag-usap daw silang sa career muna nila mag-focus at saka na ang kanilang lovelife kaya, after two months, break na sila. Hindi ito sumagot kung desisyon ng GMA Artist Center ang kanilang break-up.

Nahalata lang na mahal pa rin nito si Megan nang may magtanong kung okey sa kanya kung liligawan ni Chuck Allie ang ex-gf. "Ayaw ko po," ang sagot nito.

Samantala, sa Sunday na, March 26 mapapanood ang Season 10 ng L2L. Ang My Darling Mermaid nina Mark Herras at Pauleen Luna ang ka-back-to-back nila.

* * *

Pinagsama-sama ng Extra Challenge sa Dream Date episode ang ilan sa batch 1, 2 & 3 ng StarStruck. Sayang lang at agad na-eliminate sina Jelaine Santos ng SS 2 , Rea Nakpil at Sara Larsson ng SS 3, walang nangyaring bonding sa kanila.

Representative ng SS1 si Katrina Halili at LJ Reyes ng SS2 pa rin. Ito ‘yung episode na sinabi ni Richard Gutierrez na guest siya. Pipili siya sa mga participant ng kanyang dream date. After ma-eliminate ang tatlo sa unang araw ng challenges, naiwan sina Katrina, LJ, Aryanna, Aifa Mendoza at Jacque Estevez ng Sexbomb.

Samantala, matanong nga kay Jelaine kung totoong nag-audition sila ni Krizzy Jareño, kasama niya sa SS2 for a role sa Majika. Disappointed daw ang dalawa’t nalamang naibigay na sa iba na hindi nag-audition ang role. Wala naman palang saysay ang pagpunta nila sa Antipolo para mag-audition dahil may napili na ang staff.