Mahal ang ibinayad ni John para sa pamilya

Hindi namin natagalan ang panonood kay John Prats sa Bahay ni Kuya habang tinatanggalan siya ng buhok sa kanyang buong katawan sa pamamagitan ng wax.  Ito ang naging challenge sa kanya ni Big Brother para makita lamang niya kahit sandali ang kanyang mga magulang at kapatid na si Camille na tinanggap naman ni John.

Habang ongoing ang pagwa-wax at pagtatanggal ng buhok sa katawan ni John, nasa labas lamang ng Bahay ni Kuya ang kanyang daddy at mommy at kapatid na si Camille. Maging sila ay nasasaktan sa tuwing umaaray si John. 

Sa totoo lang, napakalaki ng ginawang sakripisyo ni John para makita lamang niya ang kanyang pamilya na mahigit isang buwan na niyang hindi nakikita pero at the same time, humanga kami sa tapang na kanyang ipinakita. Ipinamalas din niya kung gaano niya kamahal ang kanyang pamilya.  Ang mommy ni John na si Alma lamang ang pinayagan ni Big Brother na pumasok sa loob ng bahay para mayakap si John sa loob ng isang minuto pero ang kanyang daddy (Dondee) at kapatid na si Camille ay nakita lamang niya sa salamin at hanggang kaway lamang sila.

Kung nagpakita rin ng pagsasakripisyo sina Aleck Bovick at Rico Robles sa pamamagitan ng pagpapakalbo kapalit ng tig-iisang daang libong piso na ang beneficiary ay ang amang maysakit ni Aleck at pamilya ng katulong ni Mich Dulce, kani-kanya ring sakripisyo ang ipinakita ng iba pang housemates tulad nina Keanna Reeves at Gretchen Malalad na nauna nang na-evict nung Miyerkules kasama sina Rico Robles, Zanjoe Marudo at John Prats.  Nung nakaraang Martes ng gabi, tinanggap ni Gretchen ang hamon ni Big Brother na siya’y maga-ala-musical doll sa loob ng 24 oras.

Mukhang mas mahihirap ang tasks na ipinagagawa ni Big Brother sa Celebrity Edition ng PBB kumpara sa naunang edition.

* * *

Lingid sa kaalaman ng marami, nag-MU (as in mutual understanding) noon sina Angel Locsin at Dennis Trillo nung nagsisimula pa lamang ang Mulawin tele-fantasya. Ito’y kinumpirma sa amin ng isang taong malapit sa dalawa. Naudlot lamang ito nang pumasok sa eksena si Richard Gutierrez na sinundan ni Oyo Boy Sotto na siya ngayong boyfriend ni Angel.

Naudlot man ang pag-iibigan nina Angel at Dennis, napanatili naman nila ang pagiging close sa isa’t isa.  Natutuwa rin sila na tanggap ng mga manonood ang team-up nilang dalawa kaya naman sila ang muling pinagsama ng GMA-7 sa pinakabagong tele-fantasya ng Kapuso network, ang Majika na magsisimulang mapanood sa darating na Lunes, Marso 20.

Kung naabot ng Darna ang 52% at 48% rating, maabot din kaya ito ng Majika?

* * *

Napakabilis talaga ng panahon!  Parang kailan lamang nung nagsisimula pa lamang ang Pilipino Star  Ngayon na nakipagsabayan sa mga malalaki at establisado ng mga tabloids noon.  Pero pagkaraan ng dalawang dekada, heto’t number one na at patuloy na umaarangkada ang PSN na pinamumunuan ng batang-batang si G. Miguel G. Belmonte bilang presidente.

Sa araw na ito ng Biyernes (March 17) ay ipinagdiriwang ng PSN ang kanyang ika-20 anibersaryo at isang malaking okasyon ang nakatakdang mangyari sa Westin Philippine Plaza.

Isang malaking karangalan ang mapabilang sa isang babasahin na tinatangkilik ng mga mambabasa hindi lamang dito sa Pilipinas kundi maging sa ibang bansa.

* * *

a_amoyo@pimsi.net