‘Di ko sinisira ang Dingdong/Karylle loveteam’ — Iza

Nagulat na lamang si Iza Calzado when told na galit sa kanya ang mga fans nina DingdongDantes at Karylle dahil sinisira raw niya ang loveteam ng dalawa. Nag-uugat ang kanilang galit sa pagtatambal nila ni Dingdong sa pelikula ng GMAFilms na Moments of Love, oo kasama rin sa movie si Karylle pero, di siya ang talagang ka-partner ni Dingdong kundi si Iza.

"Wala akong kinalaman dun, it’s the company’s decision. I understand that their fans will get hurt but I think maiintindihan nila. Kung panonoorin nila ang pelikula, I’m sure kikiligin sila," paliwanag ni Iza.

Ang Moments of Love ay nagtatampok sa tatlo, Iza, Dingdong at Karylle. Punung-puno ng matitinding emosyon ang pelikula na aantig sa mga manonood. Bagaman at di totoong loveteam sina Iza at Dingdong, maganda ang chemistry nila, kikiligin ang makakapanood sa kanila.

Bilang Marco, malaki ang iginaling ng arte ni Dingdong sa pelikula. Nagawa niyang paiyakin ang mga nanonood ng shooting sa isang eksena ng pelikula na kung saan ay naghihinagpis siya sa pagkawala ng kanyang minamahal.

Si Karylle si Lianne, ang babaeng nagmamahal kay Marco sa kasalukuyan pero, balewala siya rito.

Naipakita ng tatlo ang kanilang husay sa pag-arte sa movie tungkol sa isang lalaki sa kasalukuyan na umibig sa isang babae sa nakaraan (1957).

Di dapat palampasin ang pagkakataong makita ang tatlong kabataang artista sa isang di matatawarang pagganap simula sa Marso 29.

* * *

Ang sarap talagang mag-birthday! Sayang at once a year lang itong dumarating. Sarap tumanggap ng mga regalo, makabasa ng mga pagbati sa text at magkaro’n ng party, kahit kainan lamang.

Nung Martes, bongga ang naging kainan namin sa office dahil ang dami-daming nagpadala ng pagkain at regalo. Paalis na ako ay nagdaratingan pa ang pagkain. Bagaman at may mga nauna na akong pinasalamatan, may dumating ring grasya from Mowelfund, GMA Corporate Communications, Globe, Jollibee, Linda Rapadas, Alex Datu, Letty Celi at Natalie Palanca. Sa kanilang lahat, salamat at sa susunod kong birthday muli!

* * *

Mabuti na lamang at wala na tayo sa panahong problema ng magulang ang pagkakaro’n ng mga anak na babae na walang karapatang magmana ng ari-arian ng kanilang mga magulang. At kung walang anak na lalaki, ang yaman ay maiiwan sa pinaka-malapit na kamag-anak na lalaki.

Ito ang problema ng isang ginang na may limang anak na babae. Kaya naghahanap ito ng isang lalaking magpapakasal sa kanyang mga anak na babae. Ang kaso, ang problema ay dadalawa lamang lalaki ang dumating. Kaya nagkaro’n ng gulo at intrigahan sa pamilya.

Paano ito maso-solve ng ginang?

Sasagutin ito ng pelikulang Pride and Prejudice na palabas ngayon sa mga sinehan, handog ng United International Pictures sa pamamagitan ng Solar International Pictures.