May posibilidad na magkabalikang muli ang nagkahiwalay na mag-asawang
Dan Fernandez at
Shiela Ysrael. Ayon sa mga taong malapit sa dating mag-asawa, on speaking terms na muli sina Dan at Shiela at hindi nila isinasara ang kanilang mga pintuan na muling mabuo ang kanilang pamilya.
Ang kaibigan nilang si
Phillip Salvador ang gumagawa ng paraan para na muling magkabalikan ang dating mag-asawa na noong isang taon lamang ay nagpalitan ng maaanghang na mga salita laban sa isa’t isa.
Sa imbitasyon ng aming entertainment editor na si
Veronica Samio, dumalo kami sa fundraising show ng
STEAM Foundation, organisasyon ng mga may kapansanan sa pandinig na unang pinamunuan ni
Aga Muhlach bilang chairman of the board. Ito’y ginanap nung nakaraang Martes ng gabi sa Kowloon House sa Quezon City. Ang fund-raising show ay pinamagatang
An Ayuda Naton (Our Support). Nakalimutan ko na ang executive directress ng
STEAM Foundation ay isa palang Waray, si
Rose Vergara. Naaliw ang ating mga kasamahan sa panulat sa mga special curacha dance number kung saan apaw ang nagtatapon ng pera sa gitna ng dance floor kung saan nagsasayaw ang isa o ilang pares. First time kasi nilang makapanood ng ganito. Naging tradisyon na ito sa mga Waray sa tuwing may mahahalagang okasyon o pagtitipon, hindi kumpleto ang pagtitipon kung walang curacha dance number.
Ang perang nakalap ay makakatulong ng malaki sa STEAM Foundation na patuloy na tumutulong at gumagabay sa mga beneficiaries ng nasabing organisasyon.
E-mail: a_amoyo@pimsi.net