Tara Tambunting, ‘k’ bang mag-concert?

Sure, marami sa inyo ang ngayon lamang maririnig ang pangalan niya -Tara Tambunting. Lalong magtataas ng kilay ang marami kapag narinig na magkakaro’n siya ng concert sa October 27 sa Music Museum na pinamagatang Tara: It’s My Life kasama sina JayR, Ogie Alcasid at ang bandang Sugarfree.

Bago tuluyang hindi bumaba ang kilay n’yo, ipakilala ko muna si Tara sa inyo.

Kinse anyos lamang siya at mapagkakamalan n’yong si Lindsay Lohan. Gusto niyang maging isang rock goddess na di bagay sa kanyang itsura dahil mahaba ang kanyang ash-blonde hair, mapungay ang kanyang mga mata na parang sa isang tuta at matamis ang kanyang ngiti.

Sa Tate isinilang at lumaki si Tara. May kaya ang kanyang mga magulang. Sa murang gulang ay kinakitaan siya ng hilig sa musika, kumuha siya ng lessons sa bass art electric guitar. Marami na siyang nagagawang kanta at umaasam na sana balang araw ay mai-record niya ang mga ito.

Sa kanyang concert sa Music Museum, kakantahin niya ang isa niyang komposisyon na pinamagatang "Misplaced." Ang konsyerto ay naglalayong ipakita sa mundo ng musika, na mayro’n isang kabataan na naghahangad gumawa ng isang malaking pangalan sa bayan na pinagmulan ng kanyang lahi at itinuturing niyang sariling bansa rin.

Ang Tara: It’s My Life na nasa direksyon ni Butch Miraflor ay mabibiyaan ang Bantay Bata Foundation Inc.

* * *

Kung may nagbibigay ng karagdagang interes sa sex-comedy play na Private Parts, bukod pa sa pangyayaring nasa cast nito sina Maui Taylor, Ynez Veneracion, Myles Hernandez, Wilma Doesnt, Allen Dizon, Avi Siwa, Sofia Rey at Behn Cervantes, ito ay ang pagkakasama sa cast ng komedyanteng si Vangie Labalan na gumaganap ng role ng dating sikat na bold star nung dekada 80 na kumabit sa maraming pulitiko, drug at jueteng lord at ngayo’y isa nang matrona.

Naloloka nga si Vangie sa kanyang role pero, at the same time ay na-challenged siya dahil kailangang i-assert niya ang kanyang sarili sa bunton ng mga nagse-seksihang artista na kasama niya sa play.

Mapapanood ang Private Parts sa Nobyembre 30, at Disyembre 1, 8NG sa Music Museum. Handog ito ng ATD Entertainment Productions, mula sa script ni Jigz Recto at direksyon ni Elwood Perez.

Mabibili ang tiket sa Ticketworld 8919999, National Bookstores, Robinson’s Dept. Stores, Tower Records, Glorietta 1, Greenbelt 1 at Music Museum 7216726/7210635. Para sa ibang detalye, tumawag sa 0927-5367911.

* * *

Full force ang lahat ng artista ng Mga Anghel na Walang Langit sa ginawa nilang outreach para sa mga batang residente ng Pangarap Shelter ng Pasay, pati na rin ang kapitbahay nitong Barangay 89, Zone 9, Pasay City.

Kumanta at sumayaw sina Johnny Delgado, Alma Moreno, Al Tantay, Ana Capri, Erich Gonzales, Sylvia Sanchez, Klaudia Koronel, Rannie Raymundo, Marianne dela Riva, Kookoo Gonzales, Angelo Ilagan, Patrick dela Rosa, Marissa Sanchez, Allen Dizon, pati na rin ang mga bulinggit stars na sina Nikki Bagaporo, Carl John Barrameda, John Manalo, Mile Ocampo at Sharleen San Pedro, pati na ang mga direktor na sina Mae Czarina Cruz, Maryo J. delos Reyes, at ang EP na si Eleanor Rodriguez.