Naghiwalay dahil hindi magkabagay

Isa kami sa nanghihinayang kay Ella Guevarra na hindi makadadalo sa isinasagawang L.A. Screamfest 2005 sa Los Angeles, USA kung saan entry ang pelikulang Sigaw na may English title na The Echo.

Para sa amin, mas nagmarka ang mga eksena ni Ella kumpara kay Angel Locsin lalo na ang elevator scene kung saan duguan siyang nagpapakita kay Angel.

At kung sakaling nasa L.A. Screamfest ang 2004 Metro Manila Film Festival ay baka magkaroon din siya ng International career tulad ni direk Yam Laranas na may agent na rin sa Hollywood.

"Hindi naman kami gagastusan ni Mother Lily (Monteverde), hindi naman ang anak ko ang bida, masyado namang mahal kung sa sarili naming bulsa manggagaling ang pamasahe," ito ang nabanggit sa amin ng daddy Dennis Guevarra ni Ella nung minsang makasalubong namin sila sa GMA 7 compound.

At ang nabanggit na elevator scene ay totoong nangyari kay Direk Yam, "Two years ago bago ko gawin ang Sigaw, alas tres ng madaling araw nagmamadali akong sumakay ng elevator pababa sa building ng condo unit ko patungong shooting ng commercial, inaantok pa nga ako no’n, at napansin ko na lang, duguan yung paligid ng elevator, may mga bakas ng kamay na gumapang sa paligid at yung inaapakan ko, puro dugo rin. 

"Akala ko, imagination ko lang kasi nga inaantok pa ako, e, nung magbukas ang elevator sa ground floor, maraming pulis at nagkakagulo, nagulat ako at nalaman ko, may babaeng pinatay sa parehong floor ko at tumakas siguro para manghingi ng tulong, e, that time, palabas ako ng unit ko, kaya siguro hindi nakasunod yung killer, actually na-publish ang crime na yun.

"Tapos habang papalabas na ako ng building, nadaanan ko yung mga patak ng dugo na fresh pa. Hindi ko nakita yung biktima kasi dinala na kaagad ng ambulansiya. Doon ko nakuha yung ideyang nasa elevator si Ella na punumpuno ng dugo."

* * *

Tiyak na problemang malaki ang kakaharapin ngayon ng kilalang magaling na actor dahil ang kanyang anak na lalaki ay nagtanan na at kasalukuyang nakipag live-in na sa kanyang non-showbiz girlfriend.

Sa kanyang ina nakatira ang bagets, pero panay ang away nilang mag-ina dahil may mga bagay na hinahanap si bagets sa kanyang amang aktor dahil hindi na siya masyadong napapansin dahil may iba na rin itong pamilya at mahal na mahal niya at dahil dito, ang kanyang ina ang parati niyang nakakasagutan hanggang sa naglayas siya ng bahay at itinanan na nga ang jowang bagets din.

In fairness, kung ano ang hilingin ng bagets sa amang aktor ay bigay kaagad na hindi man lang tinatanong ng amang aktor kung kumusta na ang anak, kung nag-aaral pa ba, kung okey ba siya at kung may problema.

Puro ang ina ng bagets ang nagpapaliwanag ng lahat, kaso nagsawa na si bagets kung bakit kailangang parati ang ina ang kausap simula pa nung isilang siya.

As of now, hindi pa nakikita ang bagets at kung saan ito ngayon nakatira.

* * *

So, si Sharon Cuneta naman ang guest ngayon ng Showbiz Stripped, after Kris Aquino?

Mukhang napadadalas na ang guestings ng ABS-CBN talents sa late night show nina Ricky Lo at Melanie Marquez, ano kaya ang ibig sabihin nito? Tinatapos na kaya ng Dos ang network war sa GMA 7 dahil wala na raw nagri-rate na shows nila?

* * *

Nanghihinayang si Paolo Paraiso, kapatid ni Bubbles Paraiso dahil nakipag-break na ang kapatid sa aktor na si Paolo Contis!

Ayon kay Paolo hindi click sina Paolo at Bubbles dahil magka-iba ang mundo nila.

"Sa tingin ko, hindi sila matched. Si Bubbles kasi, modelo so sa lahat ng events ng mga modelo, naroon siya, mahilig gumimik pa, si Paolo, hindi yata niya type ‘yung mga ganun. 

"Parang hindi sila magkasundo sa ganung bagay, e, siguro para hindi na lang sila parati magkaroon ng conflict, they decided to be friends na lang. So far, okey sila as friends," pahayag ni Paolo.

Samantala, ka-join pala si Paolo sa sex comedy na All About Men 2. Penis Talks Reloaded na mapapanood sa Music Museum sa October 14, 15, 21 at 28 mula sa direksyon nina Joel Lamangan at Mel Chionglo.

May kissing scene sila ni Polo Ravales at kinukulit nga raw niya itong i-rehearse na nila ang nabanggit na halikan, pero tigas daw sa kaiiling ang aktor. — REGGEE BONOAN