Sarah, bigay na bigay sa concert kahit walang aircon ang Araneta

Nag-walk out ang ilang entertainment editor sa concert ni Sarah Geronimo na ginanap sa Araneta Coliseum last Friday night dahil sa init at hindi maganda ang puwestong ibinigay sa kanila.

Ayon mismo sa mga nakausap naming kasamahan sa panulat, "Nakakaloka ang PR ng concert. Upper Box ang ibinigay na ticket, kulang na lang sa General Admission kami ilagay! Nakakatampo lang kasi ‘yung ibang kasamahan natin sa trabaho, nasa patron naman. 

Dagdag pa na sira ang aircon ng buong Big Dome nung gabi kaya lahat daw ng taong nanood ay talagang paypay to death at panay ang sigaw ng aircon!

Kuwento naman mismo ng taga-production, "Naawa kami kay Sarah dahil halata mong hirap siya dahil mainit, pero bilib ako sa batang ‘yun, mahusay talaga, naitawid niya ng maayos ang show.  Mahirap mag-concert ng mainit no?"

At higit sa lahat, kumita raw ng husto ang Viva Concerts dahil in fairness, punung-puno ang Araneta.

* * *

May nagparating sa amin na galit na galit daw ang floor director ng Wowowee na si Mel Feliciano sa Kolokoy Boys dahil sa lumabas na item namin dito sa PSN kahapon, Sabado na binugbog niya ang dalawa sa miyembro nito.

Ayon pa, huwag na huwag daw makakakita ng Kolokoy Boys si Direk Mel dahil sasakalin daw niya sa sobrang galit.At guest ngayong hapon sa The Buzz ang floor director ng Wowewee para i-explain daw ang buong pangyayari.

At dahil gustong umiwas na rin sa gulo, nagpasya na ang grupo ng Kolokoy Boys na hindi na suportahan ang Wowowee dahil lang sa nabanggit na floor director. — Reggee Bonoan