Actor/singer, mahilig mag-walk out!

Dumalaw ang ilang press people sa taping ng isang sitcom. Mainstay dun ang sikat na komedyante at singer na nalalagay ngayon sa kontrobersyal dahil sa pakikipaghiwalay nito sa kanyang misis.

Umiwas ang aktor na mainterbyu siya. Pinakiusapan din ng staff ang mga reporter na huwag na lang interbyuhin dahil baka mainis at biglang mag-walk out kung saan mabibitin ang taping. Pag tinoyo pala ang aktor ay bigla itong lumalayas sa taping.

Raymond, Nais Maka-Penetrate Sa Hollywood

Isa sa pangarap ni Raymond Bagatsing ay maka-penetrate din sa Hollywood gaya ni Cesar Montano.

Ito ang dahilan kung bakit sumali siya sa Hollywood Dream ng ABC 5. Hindi naman nababakante sa telebisyon ang magaling na aktor dahil kasama pa siya sa Sugo ng Siete.

Kumusta naman sila ng kanyang dating asawang si Lara Fabregas?

"Hindi naman nawawala ang communication namin. Nang huli nga kaming mag-usap ay nasabi niya ang tungkol sa kanyang pagpapakasal. Wala akong girlfriend ngayon at hanggang pa-date-date lang muna. Kapag hindi ako busy sa showbiz commitment ay tumutugtog kami ang aking bandang Bandidos," sabi ng aktor. Lead singer ang actor sa banda.

Nagpalaki Sana Ng Katawan Para Sa Zuma

>Sa party ni Wilson Tieng ay nakakwentuhan namin si Ben Yalung ng Cine Suerte at sinabi nito na ilan ding popular celebrities ang nag-audition para sa Zuma. Nagpalaki ng katawan si Carlo Maceda dahil personal choice siya ng director na si Willy Milan. Kaso mas pinaboran ng prodyuser (Ben Yalung) na si Alex Crisano ang gawing bida. Katwiran nito ay bagong mukha ito at kilala na rin dahil sa kontrobersya nila ni Ethel. Isa pa, ayon sa prodyuser mas bagay sa papel na Zuma si Alex.

Hindi pa siya gaanong matatas sa pagsasalita ng Tagalog pero ayon kay Ethel tuturuan niya ito ng wastong pagsasalita at pagbigkas ng Tagalog.

Gelli, Pinanonood Na Si Ariel

Inamin ni Gelli de Belen ng Sis na hindi niya pinanood noon ang kanyang asawang si Ariel Rivera sa soap opera na pinagtambalan nila ni Regine Velasquez. Nagseselos siya lalo na kapag may lovescene ang dalawa.

"Nagseselos ka pa ba gayung dalawa na ang anak n’yo?" tanong namin.

"Syempre hindi maaalis yun dahil mahal na mahal ko siya," aniya.

Pero ngayon ay pinapanood na niya si Ariel sa Sugo dahil wala itong kapareha sa teleserye.