Panliligaw ni Mura gusto nang sagutin ni Mahal

Mukhang desidido na talaga itong si Mahal na sagutin na ang panliligaw sa kanya ni Mura. Nang tanungin ko ito kung sino sa mga lalaking nasa showbiz ang gusto nitong makatuluyan ay depenido ang sagot nito na si Mura na. Ayon kay Mahal, talaga sigurong silang dalawa na ni Mura ang magkakatuluyan dahil wala naman daw magsiseryoso sa kanilang dalawa na mga normal na tao.

Ayon pa rin kay Mahal, sa edad niyang 30-anyos ay gusto na rin niyang magkaroon ng pamilya, dangan lamang at hindi pa talaga ibinibigay sa kanya ng Panginoon ang lalaking kanyang mamahalin hanggang sa dumating sa kanyang buhay si Mura.

Idinagdag pa ni Mahal na sa ngayon ay pinag-aaralan pa raw niya kung talagang may pagtingin din siya kay Mura at kung maramdaman niya raw na mayroon na rin siyang nararamdaman dito ay agad niya itong sasagutin.

Inamin din ng bansuting dalaga na noong una ay natatakot siya na baka tumanda siyang dalaga, although talagang itinanim na raw niya sa kanyang isip na posible ngang tumandang dalaga na lamang siya, ngunit nabuhayan daw siya ng loob nang sabihin sa kanya ni Mura na gusto siya nito. Dahil dito ay nangako si Mahal na kapag may naramdaman siyang pag-ibig kay Mura ay hindi na siya magpapatumpik-tumpik pa na sagutin ito. – TONTON VILLAMOR