Anak ni Joey, cum laude sa Fordham U, USA!

Hindi man nakapagtapos ng kanilang pag-aaral ang dalawang panganay na anak ni Joey de Leon kay Daria Ramirez na sina Cheenee at Keempee de Leon, mukhang bumabawi naman si Joey sa kanyang mga anak sa misis niya ngayong si Aileen Macapagal.  Ang kanilang panganay na anak na si Jocas ay kamakailan lamang nagtapos ng kanyang pag-aaral sa Fordham University sa New York, USA at hindi lamang ito basta-bastang nagtapos dahil grumadweyt itong cum laude sa kanyang kinuhang kurso.  Syempre, very proud si Joey sa kanyang panganay kay Aileen dahil malaking karangalan ang ibinigay nito sa kanilang pamilya.

Sinabi ni Joey na nung umpisa ay hesitant umano siya na pag-aralin sa ibang bansa si Jocas dahil malalayo ito sa kanilang mag-asawa at sa kanyang mga kapatid pero si Jocas na mismo ang humiling sa kanyang mga magulang. Syempre pa, hindi rin biro ang magpaaral sa Amerika pero iginapang ito ni Joey.

Speaking of Joey, kung meron mang TV personality ang pinakamatagal na sa larangan ng telebisyon bukod sa comedy king na si Dolphy ay walang iba ‘yon kundi si Joey na mahigit tatlong dekada na rin sa larangang ito.  May tatlo siyang regular TV show, ang top-rating at long-running noontime program na Eat Bulaga at ang Nuts Entertainment sa GMA-7 at ang Wow Mali sa ABC-5.