Di mapakali dahil sa laki ng boobs

Nang hindi pa nagsisimula ang isang TV program ay panay ang rampa ng sikat na TV host dahil seksing-seksi ito sa kanyang kasuotan na halos nakaluwa na ang boobs.

Pero siguro nang makita ito sa monitor ay naasiwa ang TV host dahil hindi maganda ang dating sa telebisyon. Kumuha ito ng kwintas na may mahabang pendant para di ma-focus ang paningin ng mga manonood sa malulusog niyang dibdib.

Baka nga naman mapag-initan siya ng MTRCB.

Ang TV host na biglang na-conscious sa boobs at natsitsismis na boyfriend ngayon ng young actor.

May Nobyang Atenista

Hindi na gaanong apektado si Baron Geisler sa pagpapakasal ng dating nobyang si Jodi Sta. Maria dahil may bago itong nobya na nag-aaral sa Ateneo. Non-showbiz ang girl.

Inamin nito na iiwasan na niyang gumawa ng mga bagay na di kanais-nais para maiwasan ang mga naglalabasang negatibong balita. Babawi raw siya at magko-concentrate na sa kanyang career.

Nagkaroon na ito ng leksyon at nagpapasalamat dahil hindi naman siya pinabayaan ng Dos at binigyan pa uli ng ikalawang pagkakataon.

"Mamahalin ko na ang trabaho ko. Semi-regular ako sa Vietnam Rose," anang aktor.

Napaiyak Si Piolo Dahil Sa Anak

Naging guest kami sa re-launching ng The Buzz noong Linggo kasama sina Danny Vibas, Edgar Cruz, Leo Bukas at Jet Valle. Tinalakay na isyu ang tungkol sa kumakalat na sex video ni Piolo Pascual. Nang tanungin ko kung ano ang initial reaksyon nito tungkol dito ay nasabi lang niya ng "Eto na naman dahil ilang beses na akong nalalagay sa blind item na kumukwestyon sa aking gender. Hindi ko alam kung bakit may ilang taong gustong sumira sa aking pagkatao. Wala naman akong ginagawang masama sa kanila. Ang inaalala ko lang ay ang aking anak dahil ayaw kong masira ako sa kanya."

Habang nagpapaliwanag tungkol sa isyu, di nito napigilan ang umiyak lalo na kapag nababanggit ang anak.

Walang balak magdemanda si Piolo sa nagkakalat ng pekeng sex video.

Rochelle Sa Magpakailanman

Hindi lang magaling na dancer si Rochelle Pangilinan na siyang pambato ng Sexbomb Dancers kundi magaling ding umarte.

Patutunayan nito na may ibubuga rin siya sa drama at gagampanan nito ang papel ni Mitchel Martinez na siyang kauna-unahang Pinay na naging kampeon sa international women boxing.

Naging varsity player ng kanyang iskwela si Mitchel sa track and field. At nagwagi ito sa unang boxing event sa SEA Games sa Thailand ng 2001 at nanalo rin noong gold medal sa Taiwan din nung 2002.

Makakasama ni Rochelle sina Daria Ramirez, Ronnie Lazaro, Lester Llansang at StarStruck Avenger 2005 na si Ailyn Luna.

Mapapanood ang MKM bukas ng gabi hosted by Mel Tiangco sa direksyon ni Argel Joseph.

Type Si Cogie

Natupad na rin ang matagal nang pangarap ni Ryza Cenon na maging isang artista. Kapag nabigyan ng break at magkaroon ng solo movie, gusto nitong makapareha si Cogie Domingo na matagal na niyang crush.

Pero sa ngayon, ayaw nitong magka-boyfriend dahil marami pa siyang pangarap na nais matupad. Nakadeposito ang napanalunan nitong pera mula sa StarStruck 2 at dadagdagan pa nito ang kanyang ipon para makabili ng bagong bahay.