Naging Darna na rin sa LT nun

Nakapag-taping na si Lorna Tolentino para sa Darna series ni Angel Locsin na malapit nang umere sa GMA 7.

Gagampanan ni Lorna ang papel na Adran na magpapasa ng bato sa taong karapat-dapat at si Angel nga bilang Narda.

Naging Darna na pala si Ms. LT nu’ng 13 anyos siya sa RPN 9. Tumagal lang ang programa ng tatlong buwan. Ayon din kay Lorna nu’ng panahon niya nagsimula ang Darna sa TV.

‘‘Pero noon, di pa uso ang harness. This time, naka-harness ako. First time ko,’’ say ni Lorna sa amin.

Nag-pictorial na sila ni Angel na parehong naka-Darna costume. At dahil sa rami ng effects ng Darna ay naurong na naman ang airing nito sometime in April pa.

* * *

May birthday concert si Jennifer Ventura bukas, Sabado sa Thramz Bar and Restaurant along West Avenue, Quezon City na may titulong Jennifer Ventura, The Birthday Concert.

Sali sa repertoire ni Jennifer ay mga awiting laman ng debut album niya under Viva Records tulad ng ‘‘Let’s Wait A While’’, "Ayoko Nang Umibig Pa", "Love’s Grown Deep’’ at iba pang sikat na RNB songs ngayon.

* * *

Nag-pictorial na ang cast ng Say That You Love Me kamakailan sa pangunguna nina Mark Herras, Jennylyn Mercado, Tyron Perez at Nadine Samonte. Tuwang-tuwa si Mother Lily Monteverde dahil parang nakikita niya sa apat ang tambalang Maricel Soriano, William Martinez, Gabby Concepcion at Sharon Cuneta.

Napansin lang daw ng staff ng Regal Entertainment na tila naiilang sina Tyron at Nadine sa isa’t isa, parang nagkakapaan daw kapag sweety-sweety na ang pictorial, kaya’t pinagsabihan daw sila.

Parati raw may tumatawag kay Tyron sa cellphone na nakakaistorbo sa pictorial kaya raw siguro naiilang si Nadine.

Inamin naman ni Nadine na may girlfriend ngayon si Tyron at wala siya, kaya marahil naiilang ang dalagita.

Kung sinuman ang parating tumatawag kay Tyron, sana’y tigilan na niya dahil lumalabas na super insecure kay Nadine. Siguro alam niyang may pagtingin pa rin si Tyron kay Nadine.

Ikaw ba ’yan Charee Pineda?

* * *

Tuluy na tuloy na ang concert ng mag-inang Zsazsa Padilla at Karylle sa May 7 na gaganapin sa Music Museum at may titulong K to Z, Then Now.

’Yung K to Z ay galing daw kay Kuya Germs Moreno na isa sa producer at ’yung Then, Now ay galing naman kay Dolphy.

Dahil first time na magsasama ang mag-ina sa isang concert ay maraming taong kinuha para lalong mapaganda ang show at mga kilalang musicians, writers at direktor ang nasa likod ng mag-ina.

Samantala, inamin ni Karylle sa interbyu na inspired siya ngayon, hindi nga lang niya binanggit kung sino ang inspirasyon niya, bagama’t loveless siya, pero hindi ibig sabihin ay wala siyang minamahal. (Ulat Ni Reggee Bonoan)