Alessandra, kinukuhang Valentina

Mauuna pala ang airing ng Darna sa Encantadia (ito ang tamang title). Kaya, panay ang labas ng teaser nito at may pa-contest pa ng Darna… Liit sa Sis. Kung hindi babaguhin, sa March 28, na ang premiere telecast nito. Ibig sabihin, hindi na aabutin ng second week ng March ang last airing ng Mulawin, unless, gagawin ng GMA-7 na isang linggo lang ang pagitan ng last airing nito at pilot telecast ng Darna.

Nasulat na hanggang February 22 na lang ang Mulawin pero, Tuesday ito so, most probably, sa Feb. 25, Friday magtatapos ang tele-fantasy nina Angel at Richard Gutierrez.

Nagpa-audition na ang GMA-7 ng mga batang gaganap na Ding at young Narda/Darna at sa ibang character na bubuo sa Pinoy Superhero. Isa sa mga nag-audition para sa batang Darna ay si Ynna Montenegro, ang second daughter ni Nadia Montenegro. Ano kaya ang nangyari kay Kurt Perez, winner ng StarStruck Kids na nabalitang napiling gaganap sa role ni Ding?

Kino-consider sa role ni Valentina si Alessandra de Rossi pero, nang tanungin namin ang manager nitong si Manny Valera, under negotiation pa raw ang participation ni Alex at wala pang kontratang ibinibigay sa kanila.

Pababatain si Valentina para bumagay sa edad ni Angel Locsin. In fairness, bagay na bida at kontrabida sina Angel at Alex dahil hindi nagkakalayo ang kanilang edad. Naalala lang namin na sinabi ni Alex sa isang interview na takot siya sa ahas. Paano kung siya ang mapiling Valentina?

* * *

Birthday ni Raphael "RJ" Martinez sa February 13 pero, wala itong planong magpa-party. Ibu-blowout lang nito ang kanyang fans at nag-request sa ina na manood sila ng Valentine’s Day concert. Kaya lang, baka hindi nito masakyan ang repertoire ng dalawa. – Nitz Mirrales