Kailangan ng okey ni Kris bago makalabas sa 'Hiram'

Tulad ng inaasahan, maganda at pulido ang pagkakagawa ng Krystala ang kauna-unahang superserye na pinagbidahan ni Judy Ann Santos na nag-premiere noong Lunes. Unang eksena pa lang, mahu-hook ka na. Nag-enjoy ang mga batang kasama ko sa bahay sa panonood, lalo na ang mga eksenang lumilipad si Juday. Nagustuhan din nila ang mga fight scene nina Krystala at Harimon (Emilio Garcia).

Unlike the other teleserye, malinis ang pagkakagawa ng special effects. Kahit ‘yung mga eksenang lumilipad si Juday, animoy totoo. Lalo na ‘yung pag-angat niya sa lupa.

Bukod sa flying and fight scenes, hahangaan mo ang kwento ng Krystala. Malinis ang mga flashback scenes. Kailangan kasing ikwento kung bakit at paano na-acquire ni Krystala ang kanyang powers.

Lalo akong pinahanga ni Rory Quintos bilang director. Film-like ang treatment ni Direk Rory sa Krystala. Syempre, sa tulong na rin ng iba pang director na sina Trina Dayrit, Mae Cruz at Nuel Naval.

Nabalitaan ko na so far, ang Krystala ang pinakamalaking produksyon ng ABS-CBN. Milyun-milyon na ang ginastos ng ABS-CBN sa pilot episode pa lang.

Kung magpapatuloy ang magandang simula ng Krystala, walang duda na ito na ang mamamayani sa primetime television. Ang maganda kasi sa Krystala, nakuha nito ang pulso ng mga bata. Napatunayan ko ito.

* * *

Madali ang naging negosasyon ng ABS-CBN kay Alma Moreno para maging part ng Hiram. Inamin naman ng ABS-CBN na kinonsulta muna nila ang bidang si Kris Aquino bago in-offer ang role kay Alma.

Nang okey na kay Kris, tinanggap na rin ni Alma ang offer. Maganda ang role ni Alma sa Hiram. She plays a villain na paguguluhin ang buhay ni Diana (Kris). Pero ayon kay Alma, may dahilan ang kanyang kasamaan.

At sa The Buzz last Sunday, finally ay nagkita na sina Kris at Alma. Yes, nagkaroon ng one-on-one ang dalawa. Nakakatuwa ang naging takbo ng conversation nila. Kris admitted na siya ang kailangang mag-extend ng hand kay Alma. Pinayuhan naman ni Alma si Kris pagdating sa pag-ibig.

This week ang taping ni Alma for Hiram. Inaasahan na mas magiging kumportable na silang dalawa ni Kris dahil bati na sila.

Matapos makipag-ayos kay Melanie Marquez, kay Alma naman. It’s indeed forgiveness time para kay Kris. Dapat lang naman, no! Sa rami ng blessings na dumarating sa kanya.

* * *

All set for release na ang album ni Ya Chang sa Star Records. Next week ay iri-release na ito. Naikwento sa akin ni Star Records Managing Director Annabelle Regalado na ang album ni Ya Chang daw ang isa sa pinakamasayang nagawa nila.

"It’s the first time that a Japanese singer will sing Pinoy novelty songs," sabi ni Ms. Annabelle. "It’s also a collaboration of Lito Camo and Christian Marquez, considered kings of novelty songs. Kaya expect na magiging masaya at nakakaaliw ang mga songs sa album."

"Sayaw Ya Chang" ang title ng album na naglalaman ng 6 na original cuts.

Speaking of Ya Chang, nakatakdang i-feature ang lifestory niya sa Maalaala Mo Kaya. Hindi ko pa makumpirma kung sino ang gaganap sa role. Ang balita ko, si Diether Ocampo ang choice ni Ya Chang to play the role. Si Malu Sevilla ang magdidirek ng episode.

Ang nakakatuwa pa kay Ya Chang, gustung-gusto niyang ma-improve ang acting niya. Nag-undergo siya ngayon ng acting workshop under Ms. Beverly Vergel ng Workshop@ ABS-CBN.

Bukod sa MTB: Ang Saya Saya, kasama rin si Ya Chang sa Maid in Heaven. At for a daily updates sa mga ginagawa niya sa buhay, just text in YACHANG at i-send sa 2366. In fairness kay Ya Chang, ang sipag nitong mag-reply sa mga subscribers niya.