'The CompanY', going on 20

Habang tumatagal ay lalo pang humuhusay ang The CompanY sa kanilang craft. Bunga raw ito ng dedication nila sa kanilang music, ayon kay Moy Mortiz, isa sa original member ng grupo.

"We work hard for it. Kahit you have the good voice kailangan mo ring i-improve ito. We also try to work with the best people around composer, director, producer–nakakahawa yung galing nila, the more kaming nai-inspire," paliwanag ni Moy.

"Of course we will not be here all these years kung hindi sa support ng mga listeners at fans. Kahit kasi anong galing mo kung ayaw na sa iyo ng tao, wala ka na rin.

"And the main reason ng success namin ay dahil sa Panginoon. Hiram lang naman natin sa Kanya ang anumang talent natin. God allows you to excell in your field. Never kong inisip na magaling kami dahil anytime pwedeng bawiin yan ng Diyos," sabi ni Moy.

Sa bago nilang album na "Mahal Kong Radio" ng Viva Records pinagsama-sama ng The CompanY ang mga 16 hit song sa radyo at binigyan ng sarili nilang version, tulad ng nakatutuwa at nakakaindak na "Bulaklak" na ginawa nilang acapella with special partication of Ms. Bella Flores, "Mula sa Puso" na ginawa nilang ala-Carpenter ang dating, "You Are My Song", "Sana Nga", "Pagdating ng Panahon", "Forevermore" at "Hindi Na," ang carrier single ng album. Isang paraan ito ng grupo bilang pasasalamat nila sa radyo na malaki ang naitulong sa kanilang career sa paglipas ng panahon. Sa album ay meron silang 3 kanta na parang station ID ng radio na ikatutuwa ng mga listeners.

Next year magsi-celebrate ng ika-20th anniversary ang The CompanY. Ngayon pa lang ay naka-book na sila sa Oct 1 & 2 sa CCP para sa 2005 na tinitiyak nilang magiging memorable para sa lahat ng manonood.

* * *

Seryoso na pala ngayon si Daisy Reyes sa kanyang pagkanta. Ngayon ay nakatutok na siya sa kanyang singing career. Ito naman daw talaga ang hilig niya kahit noong bata siya. Madalas daw siyang sumali sa mga singing contest. Inaabot daw sila ng madaling araw sa kahihintay sa pila para lang makakanta sa mga pyesta, sa iba’t ibang probinsiya.

Binabalikan ni Daisy ang kanyang singing after a year break na kung saan nagsilang siya ng anak sa US.

"Singing talaga ang pinaka-gusto ko. Ngayon mas nabibigyan ko na ito ng time," ani Daisy.

Ang unang step ni Daisy para magtuluy-tuloy ang singing career nito ay nagbuo siya ng banda na siya ang lead singer. Tinawag niya itong Daze band. Regular silang kumakanta sa Vega Verde tuwing Lunes. Sa susunod na paglabas ni Daisy sa TV ay ipakikilala na raw niya ang kanyang banda.