Pia Guanio, di pwedeng magbakasyon sa tv

Hindi namin maiwasang mapakinggan ang usapan nina June Torrejon, manager ni Pia Guanio at Wilma Galvante, VP for TV Entertainment ng GMA-7 habang naghihintay na magsimula ang Understatement Bench Underwear & Denim Fashion Shows last August 18. Napaupo kami sandali malapit sa dalawa habang nakikipag-tsikahan sa ibang press people.

Si Pia Guanio ang pinag-uusapan nina Ms. Wilma at June. Sabi ni June, nagpaalam sa kanya ang dalaga na magbabakasyon pero, hindi niya pinayagan. "Bago pa lang siya, tapos magbabakasyon na." Ang feeling namin, ang pagho-host sa S Files ang tinutukoy ni June dahil ilang linggo palang nagti-take over kay Janice de Belen si Pia. Alam siguro ni Ms. Wilma na nakikinig kami, kaya ngumiti lang at hindi sumagot.

Overworked naman talaga si Pia sa rami ng TV show. Monday to Friday siya sa 24 Oras at araw-araw din sa Eat… Bulaga at ‘pag Sunday ay nasa S Files. Hindi na nga yata ito natutulog sa sobrang pagka-workaholic.

Tama rin naman si June sa hindi pagpayag na magbakasyon si Pia. Two Sundays mawawala sa S Files si Joey Marquez dahil suspindido, kung mawawala pa siya, sina Richard Gomez at Paolo Bediones na lang ang maiiwang host. Eh, wala yatang balak kumuha nang magpi-pinchhit kay Joey ang Ch. 7 habang suspindido ito. Kaya ‘yung hinihinging bakasyon ni Pia sa kanyang manager, malabong mangyari sa ngayon.

* * *

Natawa kami sa sagot ni Douglas Quijano nang aming tanungin kung nasaan si Joey Marquez? Ini-expect naming manonood ito ng fashion show ng Bench dahil nagkalat ang nagseseksihang mga babae.

"Umiiwas sa press," ang sagot ni DQ saka sinundan ng tawa na ikinatawa rin namin. Si Joey M. sa talent ng Ch. 7 ang sumunod kay Joey de Leon na masususpindi ng MTRCB dahil sa interview kay Mahal.

Nakakatakot I-guest si Mahal, ‘no! Naalis si Willie Revillame sa MTB dahil sa kanya at naging dahilan din siya para magkaroon ng reformat ang show. Ngayon naman, nasuspindi si Joey dahil din sa kanya. Hindi kaya dumating ang araw na wala nang kumuhang guest kay Mahal sa takot na matsugi o masuspindi? Kung bakit naman kasi ‘pag kausap si Mahal ay ‘di maiwasang pag-usapan ang sex. Tsk-tsk-tsk!

Sino pa kaya ang susunod na masususpindi kina Joey M at Joey de L? Naaaliw kami kapag nanonood ng Eat… Bulaga ngayon dahil extra careful ang mga host sa kanilang mga jokes at pagsasalita. Kapag na-feel na magri-react ang viewers, agad nagsu-sorry.

* * *

Kahit magkasama at magkatambal pa sa Joyride, malabo nang magkabalikan sa ngayon ang dating mag-on na sina JC de Vera at Julianne Lee. May kapalit na si Julianne sa puso ni JC at si Michelle Madrigal ‘yun na kasama sa 10 finalists ng Star Circle Quest.

Magkasama silang nanood ng Bench fashion show at sa na-obserbahan naming kilos nilang dalawa’y, hindi lang sila basta friends. Sayang nga at malayo kami sa kanila’t hindi tuloy namin narinig kung ano ang pinagtatalunan bago hanapin ang kanilang upuan.

Pag-uwi namin ng bahay, agad naming hinanap ang press kit ng SCQ. Nabasa namin sa publicity ni Michelle that she’s 18 years old at second year high school student ng OB Montessori Greenhills. Nakasulat din sa publicity guide na may boyfriend na siya for 10 months na. Si JC na kaya ‘yun?

Incidentally, masaya ang Ch. 7 sa magandang feedback ng viewers sa Joyride. Bale ba’y sumabay sa positive feedback ng story ang magandang rating ng show.

* * *

Hindi bothered ang mga kaibigan ni Alfred Vargas na napagkikita itong madalas may kasamang gay comedian sa pamamasyal at sa scuba diving. Kampante ang friends ng actor na friendship lang ang namamagitan sa dalawa’t hindi mauuwi sa relasyon.

Naging close sina Alfred at ang gay comedian nang magkasama sa isang TV show. Sila ang madalas magka-eksena at alam ‘nyo naman sa taping, puyatan ‘yun at dahil ilang oras kayong magkasama’y nagkakakwentuhan hanggang nagiging close at nadi-develop ang friendship.

Alam na raw ni Alfred na nagsisimula na silang itsismis ng gay comedian pero, tumatawa lang ito. Hindi raw niya iiwasan ang kaibigan dahil lang sa mga malisyosong isip at tsismis.