Rita Magdalena,naunahan ang grupo ng '30 Days' na magkaro'n muli ng career

Malaki ang papasasalamat ni Rita Magdalena sa 30 Days dahil kahit hindi siya nakasama sa 10 finalists, natupad ang dream niyang makabalik sa showbiz. Kinukuha siya ng Tape, Inc. para sa teleserye nina Nadine Samonte at Oyo Boy Sotto na ipapalit sa Ikaw Sa Puso Ko. May ilang bagay na lang daw na pinag-uusapan sa pagitan ng sexy star at mga taga-Tape at masisiguro na kasama na siya.

Bongga si Rita ‘di ba? Naunahan pa niya ang mga taga-30 Days na magkaroon uli ng career. Ang grupo nina Janna Victoria’y kailangan pang maghintay na matapos ang reality show bago malaman kung may magbibigay sa kanilang project. Sa kaso ni Rita, may papasukan na siyang show. Worth it naman pala kung ganon ang kanyang pagpapa-lipo.

* * *

Isa sa pinakamagandang newcomer sa television ang TV and print ad commercial model na si Bianca Gonzalez. Una namin siyang nakita sa fashion show ng Pink and Blue Soda kung saan silang dalawa ni Kaye Abad ang bagong image model/endorser ng Pink Soda.

Nasa showbiz na rin ang 22-year old Communication Arts student ng Ateneo de Manila University pero, hanggang TV at hosting muna ang concentration niya. Three months palang sa eksena si Bianca pero, regular na sa Wazzup Wazzup ng Studio 23 at Game Channel Extreme ng ABC 5. Guest co-host din siya ni Ryan Agoncillo sa Review Night ng Cinema One.

Walang planong mag-pelikula si Bianca’t feeling nito’y hindi siya bagay maging artista. Tama na raw sa kanyang maging kaibigan ang mga artista. Kahit sinabi naming magugustuhan niya ang movies someday, ayaw pa rin nito. Kontento na itong makilala at sumikat na TV host.

* * *

Ilang linggo nang na-dismiss ang drug case laban kay Francis Magalona pero, hanggang sa presscon ng Beautiful Life, tuwang-tuwa pa rin si Maxene Magalona. Two years din daw naghirap ang buo nilang pamilya sa pakikipaglaban na mapawalang-sala ang kanyang ama.

"Nasabi ko talagang life is beautiful (obvious bang nag-plug ng kanyang pelikula si Maxene?), nang maging free na ang dad ko. Tuwang-tuwa kaming lahat, ang sarap ng feeling na wala na kaming pino-problema. Pati kaming magkakapatid, nakahinga nang maluwag," banggit ni Maxene.

Nahaharap na raw nila pare-pareho ang kanilang pag-aaral at sa kaso ni Francis, ang kanyang trabaho na wala nang inaalala. Ayaw na ni Maxene na maulit pa ang nangyari sa ama at ibang miyembro ng kanilang pamilya.

* * *

Hindi bothered si Nikki Valdez na nata-type cast siya sa role ng best friend ng mga bida sa mga pelikulang kanyang ginagawa. Iba’t ibang character naman daw ang kanyang ginagampanan. Sa Now That I Have You, bestfriend siya ni Batsy (Bea Alonzo) at taga-advice kung paano ito makakita ng boyfriend.

* * *

Hanggang sa production number sa ASAP Mania na lang yata magkakasama sina Heart Evangelista at John Prats. May dance number ang dalawa kasama ang loveteam nina Danilo Barrios-Aiza Marquez. Rafael Rosell-Pauleen Luna at Zeppi Borromeo at Angelene Aguilar.

Hahataw din sa sayawan sina Shaina Magdayao at Rayver Cruz kasama ang ibang member ng Anime at Hotlegs sa saliw ng kantang "One Way or Anothers" ni Mandy Moore. Bakit kaya hindi kay Jolo Revilla ipinareha si Shaina? Nagtatanong lang kami!