Drew Arellano, lucky charm ng 'Click'

Ngayon ay kilalang direktor na sa TV at pelikula, bukod sa pagiging actor/comedian si Edgar Mortiz. Noong kasikatan nila nina Nora Aunor, Tirso Cruz III, at Vilma Santos, isa sa mga leading teen idol si Bobot.

Sila ngang apat, dahil sa labis na popularidad, merong mga sariling magasin o komiks. Ang kay Edgar ang Movie King at si Vilma naman may Movie Queen magasin. Ang Superstar komiks at iba pang magasin para kay Nora Aunor, maging si Tirso ay may "Pip" Teen idol magasin.

Nagsimulang magdirek sa TV si Edgar Mortiz sa Tropang Trumpo ng Channel 5. Siya rin ang unang nagdirek ng mga toprated shows sa ABC na Wow Mali at Sing-Galing.

Lumipat siya sa ABS-CBN at naging direktor naman ng Magandang Tanghali Bayan o MTB. Nang umalis siya sa Dos, naging Masayang Tanghali Bayan ang noontime show na ilang taon din niyang dinirek. Hindi nga lang tayo tiyak kung naging masaya na ang tanghali ng mga nagpapalabas ng show, kung rating ang pagbabatayan.

Bilang aktor ay nakalabas din si Mortiz sa ilang dramedy sa Channel 2. Nakapag-direk din siya ng pelikulang Pera o Bayong para sa Star Cinema.

Kahit ang misis ni Edgar ay kapatid ni Charo Santos na siyang executive ng ABS-CBN TV, lumipat si Edgar sa Channel 7. Ngayon nga ay isa siya sa mga bida ng toprated sitcom na All Together Now kasama sina Christopher De Leon, Johnny Delgado at Pops Fernandez.

* * *

Si Drew Arellano naman, bukod sa All Together Now meron pang dalawang shows sa GMA-7. Una siyang nakilala sa Click.

Siguro nga, isa sa mga lucky charms ng Click si Drew. Kahit ano kasi ang itapat na show ng kalabang network, hindi madaig ang Click. Napapalitan na ng iba’t ibang katapat na palabas, pero hindi pa rin matinag ang Click.

Pinagpilitan ni Drew na wala siyang girlfriend ngayon, although sa limang naging ka-relasyon niya, tumagal ng husto ang pinakahuli niyang girlfriend na last year lang sila nag-break.

Tapos ng marketing sa Dela Salle University si Drew at nagamit niya naman ang kanyang pinag-aralan dahil nag-opisina siya bago maging artista at commercial model.

* * *

Tila fatal attraction ang relasyon ng isang showbiz personality sa kanyang dating ka-live in. Halos kasi hindi na makalabas ng bahay ang macho sa mahigpit na pag-gwardya sa kanya ng kanyang chicka.

Noon nga, pati ang kanyang mga showbiz engagement hindi niya nasiputan dahil ayaw siyang palabasin ng bahay ng kanyang very possessive na lover.

Nasakal na yata ng husto ang macho kaya’t iniwan na ang ka-live in. Hanggang ngayon hindi pa alam ng malukis-lukis na babae na lumipad na sa ibang bansa ang kanyang pinakamamahal, at binabalikan na ang kanyang tunay na misis!