Resort sa Lipa,itinanggi ni Vilma Santos

Pinagtawanan lamang ni Lipa City Mayor Vilma Santos ang lumabas na balita sa Philippine Daily Inquirer noong Lunes na nagmamay-ari siya ng isang resort sa Lipa, Batangas. Ayon kay Mayor Vi, walang katotohanan ang naturang balita at isa lamang ito sa mga black propaganda laban sa kanya dahil sa eleksyon.

"No! Hindi po totoo iyon. I don’t own a resort here. Paninira lang iyan ng mga kalaban ko sa pulitika." Ang natatawang pahayag ni Mayor Vi.

Idinagdag pa ng actress-turned-mayor na kahit na kaya niyang bumili ng properties sa kanyang sariling pera ay hindi niya ginagawa dahil ayaw niyang mabahiran ng pulitika ang kanyang pagbili ng ari-arian. Ayaw rin umano niyang gamitin ang kanyang kapangyarihan bilang alkalde ng lungsod upang makakuha lamang ng mga property.

Bukas din si Mayor Vi sa imbestigasyon sa umano’y kanyang resort na tinawag na Baluarte Sur Leisure Farms and Resort na nakatirik sa Mt. Malarayat sa Barangay Talisay upang malaman kung sino talaga ang tunay na may-ari nito.

"Open ako para sa isang imbestigasyon para malaman nilang hindi ako ang may-ari ng resort."

Maging ang Provincial Environment and Natural Resources Office (PENCOR) na umano’y nagpatigil sa konstruksyon ng naturang resort ay hinikayat din ni Mayor Vi na magsagawa ng imbestigasyon.

Ang Baluarte Sur ay ipinatigil umano ng PENRO matapos madiskubreng wala itong kaukulang papeles para sa konstruksyon at maging dahilan ng pagkatuyo ng Talisay River na siyang nagsu-supply ng tubig sa buong barangay ng Talisay. — Tonton Villamor