Wala na ang 'Tara Tena' pinalitan ng ng Weekend Love

Nakausap ko si Ms. Rikka Dylim, Promotion & Publicity Manager ng ABS-CBN Talent Center tungkol sa isyu ng ticket sales ng concert ni Piolo Pascual, ang Piolo Pascual: First Time In Concert sa Sabado na gaganapin sa Araneta Coliseum.

Ayon kay Rikka, "Maganda ang turn-out ng ticket sales ng concert. Very confident kami na lahat ng nagmamahal kay Piolo will all be there to support him. Pinaghandaan talaga nila ang concert na ito."

Nilinaw din ni Rikka ’yung nasulat na nagdadamot sila ng compli tickets para sa press.

"Unang-una, Star Records ang producer ng concert. Kami sa Talent Center, support lang kami kay Piolo. "Yung ibinigay na compli tickets ng Star Records, as much as possible, gusto naming ma-distribute evenly sa press. Para ’yung priority people like editors, gusto naming makapanood. Mismong staff ko nga, hindi ko mabigyan ng compli ticket dahil inuuna namin ang press people. It’s kind of unfair lang na nagmamagandang-loob ka lang, ikaw pa ang palalabasing masama," hinampo ni Rikka.

Speaking of Rikka, gusto ko siyang pasalamatan sa compli ticket na ibinigay niya sa akin.

Kahit isang ticket lang ’yon, na-appreciate ko na. Basta ang gusto ko lang ay mapanood at suportahan si Piolo sa kanyang major concert sa Sabado.

* * *

Simula sa April 24, papalitan na ng Weekend Love ang Tara Tena. Mas pinaganda ng ABS-CBN ang programa. Tampok pa rin dito ang mga sikat na kabataang artista ng ABS-CBN Talent Center. At malaki ang suportang ibibigay ng Department of Tourism sa weekly episodes.

According to Weekend Love executive producer Mae Santos. "Maiiba ang look. Pati mga locations, iba-iba rin. Kahit ’yung mga team-up, magiging very exciting din. This is our way of providing our Pinoy audience a good Saturday morning viewing."

Mae Santos is proud to say na sa programang Weekend Love, unang makikita ang mga bagong loveteams ng ABS-CBN.

Kung inyong matatandaan, sa programang Star Studio unang nakilala ang sikat na ngayong loveteam nina John Lloyd Cruz-Bea Alonzo, John Prats-Heart Evangelista at Alwyn Uytingco-Shaina Magdayao.

Sa pilot episode ng Weekend Love sa Sabado, 10:30 hanggang 11:30 ng umaga, bida sina Onemig Bondoc, Michelle Bayle at Rafael Rosell. Kinunan ang episode sa Boracay. Si Andoy Ranay (isa sa mga director ng Marina) ang nagdirek ng episode.

* * *

For the first time, gaganap si Robin Padilla bilang isang baluga. Yes, sa Basta’t Kasama Kita this week, baluga ang role nila ni Judy Ann Santos. Ito ang unang pagkakataon na gaganap si Robin sa gano’ng role sa telebisyon at kahit sa pelikula.

"Naka-disguise sila ni Juday," says BKK executive producer Julie Ann Benitez. "Bale ’yun ang bagong undercover job nila. Mga sepulturero sila ni Juday na tutuklasin ang nangyayaring sindikato sa bilihan ng bangkay."

Nakakatuwa ang kwento no’ng kinunan ang eksena kamakailan. Aliw na aliw daw si Robin sa kanyang hitsura. Naka-body make-up sila ni Juday at naka-wig.

Ang Basta’t Kasama Kita na napapanood gabi-gabi, pagkatapos ng Star Circle Quest ay dinidirek nina Jerry Sineneng at Trina Dayrit.

* * *

Nakakaiyak ang birthday celebration ni Luis Manzano sa ASAP Mania noong Sunday. 23 years old na si Luis. Sa kauna-unahang pagkakataon, nakita kong naluha si Luis. He must be really overjoyed.

Si Edu Manzano ang unang bumati via sa VTR na mala-VJ. Sinundan ito ng mga kaibigan ni Luis at mga special women sa buhay niya.

Syempre, ang greeting ni Vilma Santos live mula sa Lipa City, Batangas. Kasama ni Mayor na bumati si Senator Ralph Recto at anak na si Ryan Christian.

Sana nga ay hindi magbago si Luis sa kabila ng tinatamasa n’yang tagumpay. At hindi pumasok sa ulo niya ang kanyang kasikatan.

Happy birthday, Luis!