Magigng asawa ng aktres, adik sa sugal

Talagang mayaman ang mapapangasawa ng magandang aktres na ito dahil ayon sa isang source ay malaki ang negosyo nito sa Amerika kung saan doon din sila nagkakilala ng nobyo.

"Pero talaga kayang in-love sa kanya si….. dahil malakas siyang magsugal. Hindi rin siya kagandahang-lalaki. Sana mag-isip-isip munang mabuti ang aktres bago tuluyang lumagay sa tahimik," anang source.

Ang aktres ay nagkaroon na ng non-showbiz bf na politician noon na akala ng marami ay pakakasalan niya pero nagkahiwalay din ang dalawa.

Lahat ng katangian ay nasa aktres na kaya maraming umaasa na sana’y maging masaya ang kanyang buhay sakaling lumagay na sa tahimik balang araw. Matagal niyang naging nobyo ang isang aktor na galing sa angkan ng mga artista na nalagay sa intriga kamakailan dahil sa problema sa non-showbiz wife.

After 27 Years Ng Pagsasama

Kasal na rin sa wakas sina Mayor Rey Malonzo at Madam Gigi.

Ayon sa host ng Okay Ka Mom sa Channel 9 na si Gigi Malonzo, itinuturing niyang pinakamaswerteng taon ang 2003. Noong December 29 ay natanggap nito ang pinakamagandang regalo mula kay Mayor Rey Malonzo, sinorpresa siya nang dumalo sa isang dinner sa Golden Apple Restaurant sa Caloocan kasama ang mga konsehala para doon pala idaos ang kanilang civil wedding.

"Sa wakas ay natupad na rin ang nobena ko kay St. Jude na sana’y makasal kaming dalawa. Sabi nga ni Mayor ay malakas ang power ng aking pagdarasal dahil pinakinggan ang aking kahilingan. Sa sobrang excitement ay naiyak ako. Bago ito ay ipinakilala ako at pinadalo sa reunion ng Malonzo clan sa Pampanga noong December 28 kung saan nadama kong tanggap din nila ako," anang First Lady ng Caloocan.

Kunsabagay, nasaksihan ko kung gaano ka-close sina Ronald Malonzo at Gigi kung saan iniindorso pa nga ito ng gwapong anak ni Mayor.

Ang church wedding nina Mayor Rey at ni Gigi ay idaraos sa Marso 6 ng taong ito sa Our Lady of Grace sa Caloocan na dadaluhan ng prominenteng tao sa iba’t ibang sector ng lipunan.

Albert, Pinayagang Mag-Artista Ang Anak

Magiging kapuso na ng GMA 7 ang anak na lalaki ni Albert Martinez, si Alfonzo na super gwapo at matangkad. Pinayagan na ng aktor ang pag-aartista nito sa isang kundisyon na hindi pabayaan ang kanyang pag-aaral sa La Salle High School. Once na bumaba ang marka sa eskwela ay tigil na rin ang kanyang showbiz career.

Sa kabilang banda, makakasama na si Albert sa Twin Hearts bilang kaagaw sa pag-ibig ni Rudy Fernandez kay Pops Fernandez. Parehong imbestigador ang role ng dalawa.

Sana’y magdidirek muna ang aktor pero isinantabi muna ito dahil para sa kanya, mas malaki ang exposure kapag may soap opera at maganda pa ang talent fee.

Baguhang May K

Nang ipakilala namin sa ilang press people si Nathalie de Leon ay maraming nagsabing may mararating ito sakaling maging seryoso sa kanyang pagpasok sa showbiz. Kahit laking Amerika ay matatas itong magsalita ng Tagalog dahil bukod sa Ingles ay araw-araw nitong ginagamit ang wikang Tagalog sa kanilang tahanan.

Palibhasa’y unica hija (may kakambal itong lalaki) ay pinagbigyan siya ng kanyang magandang mommy na si Joan na mag-artista sa kabila ng pagiging honor student nito sa San Jose California. "Naging mabuting anak kasi si Nathalie, walang naging nobyo at di nagbigay ng problema kaya nang hilinging magbalikbayan at mag-artista muna ay pinagbigyan namin ang birthday wish niya," anang mommy.

Mahusay namang sumagot sa mga interbyu ang baguhang aktres at matalino bukod pa sa maganda at maraming nagsasabing kahawig niya si Sunshine Dizon.

Paborito nito si Aga Muhlach at Vilma Santos at kung papalarin ay gustong maging dramatic actress. May background naman ito sa acting dahil lumabas na sa stageplay sa kanilang eskwelahan.

"Sana po, mabigyan ako ng pagkakataong lumabas sa soap opera para maipamalas ko ang kakayahan sa pag-arte. Bata pa ay pangarap ko nang mag-artista kaya sana magtuluy-tuloy na ang aking career," aniya.

Mahalaga Ang Utang Na Loob

Hindi namin alam kung ano ba ang problema ni Karen delos Reyes sa kanyang career gayung maganda naman ang takbo nito sa tulong ng manager na si Becky Aguila. Naghahanap pa ito ng ibang pagkakakitaan gayung dalawa na ang regular program sa Syete, Narito Ang Puso Ko at Click. Maganda rin ang naibigay ditong exposure kaya nga kilala na siya ngayon. Mahirap lang sa kanya ay namimili siya ng makakasamang talent (yon daw ka-level niya) kapag nabigyan ng raket at mataas din ang hinihinging talent fee.

Isa lang ang payo namin kay Karen kung gusto niyang swertihin ang career, mahalaga ang pagtanaw ng utang na loob sa taong unang tumulong sa iyo gaya ng iyong manager. Mag-isip-isip ka muna bago ka kumawala sa kanyang poder.