Extreme retoke sa 'Sis'

Sa pagdiriwang ng 2nd anniversary ng Sis sa GMA, isang bago at kakaibang segment ang sisimulan. Ang tawag sa portion, "Make-over to the Max".

Simple lang ang ibig sabihin nito–extreme retoke. Kung kailangan ang cosmetic surgery, orthodentistry or surgical dentistry at liposuction o kung ano pang dulot ng makabagong siyensiya na gagawin sa mapalad na bibigyan ng make-over.

Tiyak na magiging matagal ang gamutan, lalo na kung sobra ang damage sa mukha o katawan ng pagagandahin.

Tulad ng isang misis na walang lakas mag-apply ngayon sa trabaho. Pinapangit na kasi siya ng panahon. Sayang at cum laude graduate pa naman siya. Nahihiya siyang humarap sa ibang tao dahil sa kanyang di-kaaya-ayang personalidad.

Siya ang isa sa unang pagagandahin ng Sis sa kanilang "Make-over to the Max". Gagamutin si misis ng isang dalubhasang dermatologist. Mga dalawa hanggang tatlong buwan ang proseso. Kung ano pa ang mga diprensya sa kanyang itsura, reremedyuhin din ito hanggang lumabas ang isang real beauty.

Ayon sa paliwanag ng GMA executive na si Wilma Galvante, talagang magastos ang magiging portion na ito at tatagal talaga ang make-over. Ipakikita naman lahat ang proseso sa TV. Susubaybayan kung paano napaganda ang isang pasyente. And before and after, masasaksihan natin sa palabas na Sis.

Kaya kayong may mga diprensya sa inyong mga mukha, paa, may mga deformities kung saan parte ng katawan, apply kayo sa Sis ng GMA. Pag pinalad kayong mapili, matutupad na ang pangarap ninyong gumanda at maging kaibig-ibig.

Ayon naman kay Janice de Belen, marami pang mga bagong segments ang Sis na ipakikita sa mga susunod nilang shows. "We are celebrating our second year, kaya dapat doble ang ganda ng palabas na mapanood ninyo. Mahirap din namang mag-isip ng mga bagong ipakikita sa loob ng limang araw isang linggo. We are really working doubly hard to give our viewers the most entertaining and interesting features."

Kung tungkol naman sa kanilang mga personal lives. Pareho namang happy ang magkapatid. Si Gelli de Belen as usual na smooth sailing ang kanyang family life.

Si Janice naman, tumigil muna sandali ng pag-aaral ng A.B. Psychology sa Ateneo. Gusto niyang mag-concentrate muna sa kanyang pamilya at career. Ngayong lumalaki ang kanyang mga anak, she feels they need her most.

"Saka I’m really very inspired to work," dagdag ni Janice. "Syempre may nagbibigay ng inspiration and I hope na this will lead to something really lasting and beautiful."

* * *

Napakaganda, sexy at talagang mabait ang sensual pop-jazz diva na si Ive Mendes. Okey ang kanyang PR at wala siyang ilusyon na kakaiba siya kaysa sa ibang kabaro niya.

Very friendly si Ive, pagdating pa lang sa airport noong Miyerkules ng gabi. Sa Shangri-La Plaza Mall siya nagtanghal last Friday. Isa siya sa mga special guests sa launching ng Streetscape.

Talagang maraming humanga sa performance ni Ive. Nasa Streeetscape din that evening sina Pops Fernandez at Piñacolada.