Mikey, gustong ipagmalaki siya ng kanyang pamilya

Magkakaroon na ng pagkakataon si Presidential son Mikey Macapagal Arroyo na muling makasama ang malalaking action stars sa bagong handog ng Viva Films na Masamang Ugat, sina Eddie Garcia, Victor Neri at Ace Vergel.

"Very complex ang role ko rito sa movie," sey ni Mikey. "Malalim ang character ni Angelo kasi may mga nais siyang mangyari sa buhay niya na alam niyang imposibleng maganap. Mas madrama nga ako rito at talagang tinulungan ako ni Direk Willy Milan sa pagganap ko rito."

Bukod sa pagiging aktor at vice-governor ng Pampanga, isang family man din si Mikey at priority niya ang kanyang asawa na si Angela at ang kanilang anak na si Mikaela Gloria.

"Top priority ko sila pero hindi ko naman napapabayaan ang ibang responsibilidad ko," diin niya. "As a vice-governor, parang pamilya ko na ang constituents natin sa Pampanga. Gano’n din sa showbiz. Kung sino ang makatrabaho natin, itinuturing natin silang kapamilya. Gusto ko lang naman na maipagmalaki ako ng aking mga kapamilya."