Kamakailan lang ay nagkasundo na uli ang nag-alitang magkaibigan na sina Jordan Hererra at Jojit de Nero, naganap ang kanilang pagbabati bago nagdiwang ng kaarawan ang baguhang aktor, kaya paboritong paksa na naman ngayon sa mga blind items ang bagong sasakyang minamaneho ni Jordan.
Natural, dahil nagkasundo na nga uli ang dalawa, ay ipinapalagay ng marami na ang bagong Explorer na minamaneho ng baguhang aktor ay regalo ng mayamang negosyante.
Nu’ng tanungin namin si Jojit kung gaano katotoo ang balita ay ayaw umamin ng businessman, ibinenta lang daw ni Jordan ang dati nitong sasakyan, saka bumili ng bago.
Nasukol lang namin si Jojit nang sabihin namin sa kanya na nandu’n pa rin naman ang dating sasakyan ni Jordan (RAV-4), hindi naman nito ibinenta, kaya napatawang-napailing na lang si Jojit.
Kunsabagay, bago naman namin pinakisawsawan ang isyu nang naganap na hidwaan sa pagitan nina Jojit at Jordan ay tinanggap na namin sa aming sarili na isang araw ay matatalo kami sa laban.
Totoong nasaktan si Jojit sa nangyari sa kanila ni Jordan, totoo ring pansamantala ay gusto na niyang kalimutan ang baguhang aktor, pero puso pa rin ang namayani sa bandang huli.
Ang mahalaga ay masaya na naman ngayon si Jojit, kulay rosas na naman ang kanyang kapaligiran, namaalam na siya sa pagkalungkot at maligaya na naman siya ngayon.
Nalululong daw kasi ang komedyante sa sugal, lahat daw ng kinikita ng komedyante sa halos araw-araw na pagho-host ay nauubos lang sa casino, kaya pati ang negosyong kanyang itinayo ay naaapektuhan na rin ngayon.
Mabuti raw sana kung maliit na halaga lang ang natatalo sa comedian-host kapag nagpupunta siya sa casino, pero hindi nga, marami ang hinayang na hinayang sa daan-daang libo niyang ipinatatalo.
Sabi ng aming source, "Nagsimula lang siya sa slot machine, paganu’n-ganu’n lang, hanggang sa matutuhan na rin niya ang ibang klase ng sugal.
"Nu’ng mga sumunod na buwan, malakihan na siyang tumaya, umuuwi naman siyang luhaan palagi, kaya nakapanghihinayang naman ang mga pinaghihirapan niya!" sabi ng aming impormante.
Marami rin ang nakakapansin na palaging iritado ngayon ang komedyante sa pagtatrabaho, konting bagay lang daw ay sapat na para ipag-init ng kanyang ulo, kasi nga’y halos wala na siyang tulog dahil sa pagbabad sa sugalan.
Magdamag siyang nagsusugal, kapag natatalo’y mainit pa ang ulo, talaga ngang maaapektuhan ang kanyang pagtatrabaho kapag ganu’n nang ganu’n ang nangyayari.
Minsan nang pinangaralan ng kasamahan niyang host ang komedyanteng ito, pero hindi rin siya nakinig, parang nagsalita lang daw sa hangin ang may-edad na host.
"Kapag hindi siya tumigil sa kasusugal, eh, nakakapanghinayang siya, pati ang negosyo niya, tiyak na babagsak ‘yun!" sabi pa rin ng aming kakuwentuhan.