Ariel, di pinapanood ang TV show ni Gelli!

Sa isang pakikipagkwentuhan kay Gelli de Belen ay naitanong namin kung pinanonood ba siya ng kanyang asawa sa programang Sis.

"Naku hindi nga yan nanonood sa akin dahil kapag nasa bahay silang mag-ama ang pinanonood ni Ariel ay sports gaya ng tennis, basketball at football. Alam mo naman Tita na mahilig sa sports ang aking asawa. Minsan naman ay cartoons para sa aming dalawang anak," aniya.

Limang taon na rin silang nagsasama bilang mag-asawa at stable ang kanilang relasyon. Maganda ang buisiness ni Ariel-isang carshop sa Taguig na pinangalanang Auto Ko.

Kumusta naman ang Valentines Day ng mag-asawa? "Tita, di kami nagseselebrayt ng Araw ng mga Puso. Sa halip, bago sumapit ang araw na ito nagdi-dinner na kaming dalawa lang. Yong mga anak namin ay iniiwan ko kay Mommy. At least walang traffic at di siksikan," sey ng TV host.

‘The Eye’ Patuloy Na Pinipilahan

Marami kaming natanggap na feedback tungkol sa pelikulang The Eye na patuloy na tinatangkilik ng mga manonood. Kwento nga ng isang bagets na kaibigan namin ay doon sila sa sinehan nag-date kasama ang barkada at nag-enjoy ng horror movie.

Nakangiti na naman si Wilson Tieng dahil sa magandang resulta ng pelikula sa takilya.

Masculados, Parang Hagibis Ang Dating

Nakatabi namin sa upuan si Maryo J. delos Reyes nang ilunsad ang self-titled debut album ng Masculados under Universal Records. Kampante ito sa pagkakaupo dahil alam niyang magagaling ang binuo niyang grupo. Naalala tuloy namin ang Hagibis noon kung saan puro guwapo din at malalakas ang appeal ng mga myembro na kinabibilangan nina Omar Principe, Zoltan Amore, Kiro Amirati, Bok, Lester Lazaro, Robin Robel at Ailex de Asis.

Sa presscon nito ay inamin ng grupo na wala silang asawa at anak, walang ka-live-in at walang gay lovers. Naka-concentrate sila sa kanilang singing career.

Nagustuhan namin ang carrier single nilang "Sana Mama" na paborito ding patugtugin sa radio stations.

Sunshine, Masaya Kay Miko

Maganda ang aura ngayon ni Sunshine Dizon dahil in-love siya kay Miko Sotto. Hindi naman nito ikinakaila ang magandang pagtitinginan na namamagitan sa kanilang dalawa. Lagi silang magkasama sa mga lakaran at boto naman ang kanyang mommy sa aktor.

Ipinakilala na siya ni Miko sa kanyang Daddy Maru at mga kapatid nito at ayon sa aktres ay mabuti ang pakikitungo nilang lahat sa kanya.

Ano naman ang masasabi ni Sunshine sa mga negatibong balita na barumbado at mayabang si Miko? Sinabi ng aktres na kung ganito ang pag-uugali ng aktor ay hindi sana sila magkakasundo. Compatible sila sa maraming bagay at dama niya kung gaano siya kamahal ni Miko.

Sa kabilang banda inamin ni Miko na lahat ng katangian ng isang babae na gusto niyang maging nobya ay taglay ni Sunshine kaya komportable sila lalo na kapag magkasama.

Blind Item: Aktres, Laging Kasama Ang T-Bird

Balitang nagkakalabuan na ang pagsasama ng sikat na aktres at ang kanyang asawa na nagmula rin sa angkan ng mga celebrities. Tipong nai-insecure ang lalaki dahil ratsada ang career ng kanyang misis, samantalang nasa bahay lang siya. Bagama’t may inaasikaso din itong negosyo ay kakaunti lang ang kita nito kumpara sa kita ng aktres.

Ang madalas kasama ngayon ng magandang aktres na supergaling umarte kaya hindi nababakante sa soap opera ay isang t-bird. Yes, tibo ang lagi nitong kasa-kasama sa mga lakaran.