Judy Ann/Piolo movie, binitin

Nais kong ipaabot ang labis na pasasalamat sa lahat ng dumating na artista, kaibigan at mga bisita na bumati sa anibersaryo ng programa kong Mastershowman.

Salamat din dahil sa wakas ay dinalaw ako sa show ni Aga Muhlach. Salamat din sa pagpapaunlak nina Nora Aunor, Regine Velasquez, Jolina Magdangal at sa lahat-lahat. Hindi ko man mabanggit ang iba, mula sa puso ko lubos ang aking pasasalamat sa inyo na nagbigay oras para sa show.

Dalawang Sabado pa tatakbo ang selebrasyon ng ating anibersaryo. Sana nga maraming taon pa tayong mag-sama-sama ng walang tulugan...

* * *

Naniniwala ba kayo sa balitang hindi na tatapusin nina Judy Ann Santos at Piolo Pascual ang ginagawa nilang pelikula? Para sa akin, hindi kapani-paniwala ang ganitong balita.

Sa aking pagkakaalam kasi, 70% ng tapos ang pelikula. Kaya parang malabo ang ganitong balita.

Saka sigurado akong hindi papayag ang mga fans ng dalawa. Palagay ko mali ang naglalabasan.

* * *

At speaking of pagkakalat ng maling balita, sa nalalapit na concert daw ni Jolina Magdangal, may nagsasabing tatapatan ito ng ABS-CBN ng libreng concert.

Eh ano naman ito, nalaman ko na wala naman ganitong plano ang Dos. Dapat lang naman. Bakit naman nila gagawin ito?

Alam naman nating lahat na sa ABS-CBN nagsimula at nagkapangalan si Jolina kaya sigurado akong hindi nila gagawin ‘yun. O kung meron man, baka naman nagkataon lang.

Napakabait na bata ni Jolens para pahirapan siya ng ganoon ng ABS-CBN.

Basta ang importante ngayon, panoorin nating lahat ang kanyang concert sa March 1 na gaganapin sa Araneta Coliseum.

* * *

Seryoso talaga si VRB Chairman Bong Revilla sa kanyang kampanya na tapusin ang negosyo ng pirata sa bansa. Umabot sa halos P1.6 billion halaga ng pirated CDs, VCDs at DVDs ang sinunog ng grupo ni Bong sa Camp Crame kamakailan.

Ngayon lang sa buong history ng VRB nangyari ang ganitong kalaki ng bilang ang nakumpiska ng grupo ng VRB. Ayon na rin sa mga theater owners, maganda ang naging epekto nito.

* * *

Kabi-kabila ang pagpipilian nating Valentine concert sa darating na Biyernes. Nakalinya ang mga show nina Pops Fernandez at Martin Nievera, Regine Velasquez, Lani Misalucha, Ogie Alcasid, Rosanna Roces, Rico Puno, Pilita Corrales, Leo Martinez at marami pang iba.

Sino kaya ang mas maraming mahahatak na audience? Abangan natin!