Pinoy sali sa East Meets West

Simula bukas Enero 24, 8 n.g. sa Main Theater ng Cultural Center of the Philippines, mapapanood na ang kauna-unahang major musical event ng 2003 na East Meets West. Tampok dito ang mga Asian at European artists at jointly produced ng Netherlands-based ML Artistic International BV kasama ang GM nito na isang Pinay, si Meilanne Lancion at Luttikhuis BV na pinamumunuan ng pamosong European conductor na si Maurice Luttikhuis na gumawa ng mga sumusunod na musical: Cabaret (89-90), Les Misarables (91-92), Cats (92-93), Phantom of the Opera (93-96), Miss Saigon (96-99) to name a few.

Ang East Meets West ay napanood na sa Hongkong nung Agosto 2002. Itinampok din dito ang mga pangunahing Asian at Western artist, musicians, creative team, music and repertoire.

May dalawang palabas pa ang East Meets West bukod sa Enero 24, Enero 25, 3 nh. at Enero 25, 8 n.g.

Tampok sa palabas ang dalawang European lead stars na sina Claudia de Graaf at Alex Brouwer. Tatlong Pilipino ang tampok din, si Joanna Ampil na isa sa mga gumanap ng Miss Saigon sa abroad at sina RJ Rosales at Jed Maddela.

Hindi na dumaan sa audition sina RJ at Jed. Nakuha si Jed matapos na mapanood ng mga producers ang isa sa kanyang mga shows. Si RJ naman ay naimbita para makasama sa show.

Ilan sa mga awitin na bubuo ng repertoire ay ang "Circle of Life" mula sa The Lion King; "Someone Like You", "This Is The Moment" mula sa Jeckyll and Hyde; "All By Myself", "How Do You Keep The Music Playing", "Funny Valentine", "Man In The Mirror", "Iduyan Mo", "Don’t Rain On My Parade", "Crouching Tiger, Hidden Dragon", "I’ve Never Been In Love Before" at napakarami pang iba.

Bukod sa kanilang mga solo numbers, magkakaroon din ng mga numbers kasama ang ibang cast ng musical ang mga Pinoy artists.

Kasama rin sa musical ang Rhythm section ng The New Symphonics ng Netherlands at ang 40-piece crosswave orchestra ni Chino Toledo.

Makakabili ng tiket sa lahat ng National Bookstores, Robinsons Manila at Galleria, Tower Records at Music Museum sa halagang P3,000, P1,500, P500 at P350. Tumawag sa (02) 8915610 para sa iba pang detalye.

*****

Nakakatuwa ang titulo nilang "first manufactured group". Para kasing hindi sila tao, parang mechanical pero kapag nakita mo naman sila, taong-tao naman sila at tipikal na mga kabataan hindi lamang sa punto ng pananamit kundi maging sa kanilang pagkilos.

Sila sina Athena, 13, Mench, 16 at Mariam, 15, tatlong kabataan na bininyagan bilang 3Yo at sumailalim sa isang rigid training at kinailangang maihiwalay sa kani-kanilang mga pamilya sa panahon ng kanilang training.

Sulit naman, hindi lamang nagkalapit ang tatlo, naging mas magaling na performer pa sila sa inaasahan. Lahat ng nakakarinig ay nagkakaisa na perfect representative sila ng youth of today.

Si Athena ay mula sa pamilya ng musikero.

Lumaki siya sa Japan at naging weekly finalist ng Star for a Night.

Dancer of the group naman si Mench na nag-aral ng ballet nung 10 taong gulang siya. Nakalabas na siya sa theater. Nakakahawig siya ni Britney Spears pero ang boses niya ay kasing powerful ng kay Shakira.

Half Arab naman si Mariam na kumakanta na simula nung bata siya. Dahilan sa kanyang Middle Eastern heritage, kumakanta siya at sumayaw with a distinct R&B touch.

May CD single na ang tatlo mula sa Viva Records na self-titled. Tatlong awitin ang nakapaloob dito kasama na ang carrier single na "Iingatan Ka" isang Carol Banawa hit na nilagyan ng R&B flavor. Tampok sa awiting ito si Nasty Mac. Ang dalawa pa ay ang "Ketchup Song" (Asereje) at isang original composition, ang "Unang Halik".