Vic/ Donita nag-expect sa Magic 7

Kino-consider na lang ni Vic Sotto na blessing in disguise ang hindi pagpasok ng Lastikman sa Magic 7 ng Metro Manila Film Festival. "I wish them all the best. Sana nga, lahat ng pelikula mag-succeed dahil iisang industriya lang naman ang ginagalawan natin," he said during the presscon ng Lastikman na although hindi kasama sa Magic 7, qualified naman sila sa incentive and other benefits ng MMFFP. Walang difference sa treatment ng official entry sa filmfest except sa schedule ng showing - papasok sila ng January 1. "Ganoon talaga. Pero nagpapasalamat ako sa kanila dahil sa binigyan pa rin nila ng importansya ang movie namin kahit wala sa Magic 7," he added.

Naging issue kelan lang na sumama ang loob ni Vic sa ibang mga artista particular na kay Bong Revilla (Agimat) dahil negative ang naging reaction nito nang mag-decide ang MMFFP executive committee na i-include lahat ng nine movies as official entry. May ilang producer na nag-threaten na iwi-withdraw nila ang kanilang entry dahil malabo na silang maka-recover sa capital nila dahil mahahati ang moviegoers. Pero the following day, nag-change uli ng decision ang executive committee - ibinalik sa original plan, seven entries ang ipapalabas sa Christmas day at papasok ng January 1 ang Lastikman and Spirit Warriors.

"Hindi naman ako galit kay Bong. Ganoon talaga, may nagdi-decide," Vic averred.

Actually, accepted na niya ang naging decision although from the start, umasa talaga sila including Donita Rose na magkakaroon sila ng chance na makasama sa Magic 7. Besides, very supportive naman ang co-producer niyang si Orly Ilacad ng OctoArts Films kaya okey na sa kanya.

In any case, this is the first time na nagsama sa movie ang mag-amang Vic and Oyo Boy.

Si Hilario si Oyo sa movie na kasamang dumating last Saturday si Anne Curtis na ex-girlfriend niya sa presscon. "Hindi naman ako nahirapang i-convince siya (Oyo Boy) na gawin ‘to," sabi ni Vic. Alam kasi ng host/comedian na mas gusto ng anak niyang mag-aral kesa mag-artista. "Siyempre sino ba namang magulang ang ayaw matapos ang mga anak sa pag-aaral? Pero kung kaya naman nilang i-handle ng sabay - showbiz and school-- walang problema sa akin. Kaya lang ang pakiramdam ko, mas gusto ni Oyo Boy na mag-aral. Buti nga at napapayag ko siyang makasama sa movie namin.

"Marami kasing ambisyon ‘yang anak kong ‘yan. Marami siyang gustong gawin kaya parang hindi siya ganoon ka-eager mag-showbiz," he added.

Since napapayag din naman niya ang anak, nag-enjoy naman si Oyo Boy during the time na ginagawa nila ang movie. "Excited kasi ang lahat kaya masaya ang atmosphere. Saka wala na akong choice, ayokong ma-disappoint ang papa ko dahil siya ang may idea na isama ako rito," Oyo Boy averred.

Besides, si Anne Curtis ang partner niya rito kaya nag-enjoy siya (Oyo Boy) sa shooting kahit na nga ngayon ay balitang si Lucky Manzano na ang bagong inspiration ni Anne na naging girlfriend niya for two years. "Almost two years din kami so siguro it’s time to move on. And I’m always here naman for Anne. Ang importante, kahit hiwalay na kami, magkaibigan pa rin kami," he said.

In any case, also in Lastikman are Michael V., Jeffrey Quizon, Goyong, Michelle Bayle, Elizabeth Oropesa, Ryan Eigenmann, Jonee Gamboa and Evangeline Pascual with the special participation of Joey de Leon under the direction of Tony Reyes.

*****

Consistent ang clamor na malakas ang laban ni Ara Mina sa best actress category sa MMFFP for her performance sa Mano Po. Kahit sa ginanap na preview last Saturday night, ganoon din ang feedback - "magaling si Ara sa movie." Sayang lang at hindi namin napanood ng buo ang pelikula dahil jampacked ang theater. Late kasi kaming dumating ng Megamall. Halos wala ka talagang malakaran sa rami ng gustong manood ng advance screening.

Anyway, dumating si ex-President Cory Aquino sa nasabing special preview kasama si Kris. Present din si Congressman Chuck Mathay para suportahan si Ara. Marami ring nanood na friends si Mother Lily Monteverde, producer ng movie na special gift niya sa kanyang parents.

Dumating din si Richard Gomez with his wife Lucy Torres, Eddie Garcia, Direk Joel Lamangan and Boots Anson Roa.

At any rate, nagsadya ang grupo ng Mano Po sa Beijing para kunan ang highlight ng kino-consider na biggest epic saga, Mano Po led by Mother Lily with Direk Lamangan, Maricel Soriano, Kris Aquino and Ara Mina kahit nataong near-freezing ang weather do’n. Napunta ang grupo sa Tiananmen, the Forbidden City and Great Walls of China. "As in, manigas ka sa ginaw," recalls Maricel. "Mammoth wool ang katapat with matching thermal underwear. Pero wala kaming choice dahil kailangang magtrabaho," she added.

Ii-explore sa movie ang Chinoy experience, its historical and cultural influences on Philippine society. "The scenes we shot in China are key scenes that can never be done anyway or anywhere else," sabi ni Direk Joel. "There was simply no room for compromises on this one and everyone and Regal knew this from the start. Very supportive si Mother sa project na ‘to - she herself went to China months ahead of everybody else to personally arrange things with the Chinese government na gusto namin do’ng kunan," Direk Lamangan added.

Official entry sa MMFFP ang Mano Po na magi-start tomorrow.