Manager mahilig mangako sa mga guwapo

Kontrobersyal ang talent manager na ito ng mga bold star. Masipag naman siya kaya nakapagpundar ng negosyo. At isa sa pinagkakaabalahan nito ay ang kanyang club.

Naghahanap ito ng mga talent mostly mga guwapong lalaki na malakas ang appeal. Papangakuan niya ng kung anu-ano gaya ng gagawing artista at pasisikatin sila. Habang naghihintay ng break (kung mayroon man) ay pinagsasayaw niya ang mga ito sa club nang hindi yata nababayaran ayon sa aking source. Siyempre nakikisama sila (mga baguhan) dahil sa pangako ng manager na pasisikatin silang artista.

Pero napako na ang pangako at nagrereklamo na ang mga macho dancer na hanggang pagsasayaw na lang sa club ang naging trabaho.

Kulang Ang Pagkakaisa

Nabigyan ng subsidy ng Metro Manila Film Festival Philippines ang Movie Producers Distributors (MPDAP) ng halagang 75,000. Napagkaisahan ng board members ng asosasyon na magkaroon ng seminar na makakatulong ng malaki para sa movie makers.

Sa pakikipagtulungan ng MPDAP at Scenema Concept International ay nagkaroon ng seminar na may temang "The Dawn of Filipino Digital Revolution is Here." Makabuluhan ang mga paksang tinalakay. Naging guest speaker nila ay galing ng Sony Hongkong na si Bentley Young. Ipinaliwanag nito ang tungkol sa HD Camera at itinuro ang mga nagagawa nito gaya ng integrated circuit technology na ini-improve ang picture quality at functionality. "The camera’s 24-frame progressive capability converges digital and film imaging, thereby offering enough creative flexibility for either television production or full-scale movie making," anang speaker.

Nabigyan ng pagkakataon ang mga dumalong taga-pelikula na maranasan ang magnificent digital advantage ng Scenema Concept International’s cutting edge HD (High Definition) facilities.

Bagamat maraming natutunan ang mga participants ay nakakapanghinayang na wala roon ang malalaking prodyuser na imbitado kaya awang-awa kami sa coordinator na si John Suarez na tensyonado na dahil ang mga hinihintay na panauhin na siya pa namang nag-propose ng magiging tema ng seminar ay di dumating. Kasama sa mga dumating sina Brenda Bayhon at Marivic Ong ng Viva Films, Mila Pascual ng El Niño Films, Atty. Rod at Alice Poltan ng Alyssa Films, kinatawan mula sa Star Cinema at K-Productions, Maan Arriola at ang inyong lingkod ng Solar Films and Entertainment.

Nasaan ang ibang mga board members ng MPDAP na prodyuser ng malalaking kompanya? Kung di man sila nakarating ay nagpadala sana sila ng kinatawan lalo na ng mga cameramen.

Malaking paghahanda ang ginawa ng MPDAP at Scenema Concept International pero hindi nabigyan ng halaga ng ilang malalaking prodyuser.

Ina, Di Pabor Sa Bonggang Kasalan

Nakausap namin si Ina Raymundo sa presscon ng Ang Alamat ng Lawin na entry ng Metro Manila Film Festival Philippines katambal si Fernando Poe, Jr. Masayang ibinalita ng aktres ang kanyang anak na si Erika na isang taon na at napakabibo. Siya ang lovechild nila ni Bryan Poturnak. Sana nga ay doon sila sa Canada magpalipas ng Kapaskuhan pero dahil sa post production at promo ng pelikula ay malabo itong matuloy.

Nagpaplano na ring magpakasal sina Bryan at Ina kung saan sinabing hindi na kailangang maging grande ito. Gusto nitong magkaroon ng simpleng kasalan na idaraos lang sa hotel o garden wedding.

Unang nagkatambal ang magandang aktres at si Ronnie sa Eseng ng Tondo noong 1997.

Allan K., Di Naglalagare Ng Shows

Naikuwento ni Allan K na noong una ay halos ngarag-ngarag siya sa pagtanggap ng mga pagkakakitaan o raket. Siyempre gusto niyang kumita ng malaki. Kahit malalayong lugar ay naglalagare siya pero ngayon ay naiba ang sitwasyon. Hindi na siya tanggap nang tanggap ng mga shows dahil maganda na ang kanyang buhay ngayon.

Mayroon na siyang bar, ang Klownz na malapit na niyang ilipat somewhere in Quezon Ave.

Jestoni, Balik-Pelikula

Matagal-tagal din bago nasundan ang huling pelikula ni Jestoni Alarcon lalo na nang maging konsehal ang aktor sa Antipolo City.

Ngayon balik-pelikula si Jestoni via Tomagan ng Jordan Films kung saan gagampanan niya ang tunay na buhay ni Col. Romeo Maganto.

Matagal ng pangarap ng aktor na makagawa ng ganitong klase ng pelikula. Personal choice ni Maganto si Jes at lagi itong nakabantay sa set para maging makatotohanan ang pagganap nito bilang police officer.

Tiniyak nito na ang mapapanood sa pelikula ay akma sa tunay na kasaysayan ng buhay ni Maganto. Katambal ni Jes si ChinChin Gutierrez.