Ruffa hindi na nag-renew ng contract sa Century Productions

Maaaring sabihing sawa na sa limousine si Ruffa Gutierrez kung kaya’t sa kabila ng magandang trato sa kanya sa Century Productions ni Ken Botelho sa loob ng dalawang taon ay nagpasya siyang huwag nang mag-renew ng kontrata rito at sa halip ay i-activate ang kanyang career dito sa Pilipinas.

Hinayang na hinayang ang kanyang ina na si Annabelle Rama na nagsabing "Tinatrato siyang parang isang prinsesa ni Botelho. Hatid at sundo siya ng limousine, libre ang mga damit niya at malaki ang bayad niya. Nalungkot ako nang malaman ko ang naging desisyon niya."

Matatandaan na ang kumpanya ni Botelho ang nagdala kay Ruffa sa Grammy Awards, Cannes Festival at naging dahilan para makaniig niya ang maraming foreign celebrities sa maraming panig ng mundo.

"Gusto ko munang dito sa atin mag-concentrate. Baka kasi makalimutan na ako ng tao," aniya.

Sa kasalukuyan ay endorser siya ng Ricky Reyes Salons. Tumutulong din siya sa proyekto nito para sa mga batang may cancer sa PGH. Bukod sa mga guestings niya sa TV, regular siya sa sisimulang serye ng GMA, ang Habang Kapiling Ka na may isang all-star cast. Makakasama niya rito ang ex-bf niya na si Zoren Legaspi at in-demand siyang host sa mga corporate events, ang pinakahuli ay ang PAL event sa Cebu at ang Guess anniversary sa NBC Tent.

*****

Isang beses lamang lalabas sa screen sa pelikula ng Star Cinema na nagtatampok kina Aga Muhlach at Claudine Barretto ang endorser ng Benetton na si Rissa Samson pero mapi-feel ang presence niya sa buong pelikula. Dahil sa kanya, magkakakilala at mai-in love ang dalawang major characters sa movie na sina Aga at Claudine. Siya ang girlfriend ni Aga sa New York na pakakasalan nito rito sa Pilipinas, specifically sa Bicol. Hindi siya makakasama sa pag-uwi nito sa bansa dahil may tatapusin pa siyang trabaho sa Europe. Habang wala siya at habang inihahanda ang kanilang kasal, mai-in love ang boyfriend niya sa kanyang kapatid played by Claudine. Sa huli, matutuloy ang kasal niya, pero hindi kay Aga, kundi sa iba. Twenty three years old na si Rissa. Kung pamilyar ang mukha niya, ito ay dahilan sa modelo siya ng Benetton.

May kakambal siya, si Robby na myembro ng Star Circle Batch 10. Tapos siya ng BS Management sa Ateneo, may taas na 5’7" at may sukat na 32-25-34. Parehong journalists ang kanyang parents, si Robert Mananquil ng Journal Group at si Millet Martinez-Mananquil ng Philippine Star.

Host siya ng Fashion TV (FTV) Philippines at The Kikay Magazine (TV show on fashion, beauty and style sa Juice TV). May column siya sa Philippine Star (Eye Style) at nakalabas na sa tanghalan, sumayaw na kasama sina Lisa Macuja, Liza dela Fuente at ang Philippine Ballet.

Nakita siya ng Star Cinema sa Preview magazine habang nagka-cast sila sa Kailangan Kita.

Baka masundan ang Kailangan Kita dahil nag-enjoy siya sa pelikula gaano man kaikli ang role niya.

*****

Nagpapasalamat nga pala si Mother Lily Monteverde sa Eat Bulaga, simula sa producer na si Tony Tuviera, sa staff nito na pinamumunuan ni Malou Fagar hanggang sa mga hosts na sina Vic Sotto, Joey de Leon at direktor Bert de Leon sa walang sawa nitong suporta sa kanya at sa kanyang kumpanya. Sabi nga ni Mother, hindi matatawaran ang kanilang pagkakaibigan.