Jimboy galit kay Paolo Bediones

Sa halip na puro kaligayahan ang madama ni Jimboy Salazar dahilan sa pagri-release ng Synergy Music Corporation ng kanyang self-titled debut album, nahaluan ito ng lungkot at galit sa isa sa host ng programang S-Files na si Paolo Bediones dahil diumano sa sinabi nito sa programa na may kapansanan na si Mahal ay ginagamit pa niya. Sa mga hindi nakakaalam, si Mahal ang kasalukuyang girlfriend ni Jimboy.

"Kanya-kanyang opinyon lang yan. Ang alam ko, mahal ko si Mahal at nasasaktan ako kapag mayroong nagsasabi ng hindi maganda sa aming relasyon. Siya ang aking inspirasyon, ang aking anghel," anang recording artist.

Mahal was there to support Jimboy sa launching ng album nito.

Carrier single ng album ang "Nasasaktan Ka Ba" na sinulat ni Ben Escasa. Obvious na nagmamahal ang artist sa napaka-sentimental na pag-awit niya ng "Nasayang Lang", "Iyong-Iyo" at "Kahit Sino". Ang huling nabanggit na awitin, ang theme song nila ni Mahal.

Magaganda rin ang "Nasaan Na Kaya", "Here In My Heart", "Bakit Ikaw Pa", "Ang Pag-ibig" at "Tunay Nga Kaya".

Isa si Jimboy sa maituturing na magagaling na singer na naiprodyus ng programang That’s Entertainment. Nakagawa na rin siya ng album bilang Filio Salazar sa VNM Recording. Nabigyan na siya ng nominasyon sa Awit Awards (Best Rock Recording) para sa kanyang awiting "Liligawan Kitang Muli".