Mga babae ng 'Kung Mawawala Ka '

Pare-parehong interesante ang mga karakter na ginagampanan at ang mga tunay na katauhan ng mga mahuhusay na aktres sa Kung Mawawala Ka.

Kahit ang baguhang si Izza Calzado ay maraming mga kwentong di kababagutan. Tunay na world-class beauty ang anak ng choreographer/TV director na si Lito Calzado.

"Naku talagang maraming ayaw maniwalang anak ako ng papa ko," natatawang sabi ni Izza. "Bago matsismis na ampon ako, dapat siguro, makita n’yo na ang picture ng mama ko."

Ang ina pala ni Izza ay isang Spanish-Irish-Filipino mestiza. Kaya pala tipong Eurasian ang dating niya. At pwedeng-pwedeng magwagi sa beauty contest si Izza dahil bukod sa ubod ng ganda, matangkad at matalino pa.

Bihira na siguro ang nakakatanda na dating mataba si Izza. "Umabot ako sa 200 lbs.," tila nahihiya pang pag-amin niya. Kung titingnan natin si Izza ngayon, totoong milagro ang nangyari sa kanya.

Pero ilang buwan din siyang nagdusa sa pagre-reduce. May mga panahon na puro tubig at soda crackers lang ang kinakain niya.

Siyempre noong overweight pa ang dalaga, hindi niya mapasok ang showbiz. Pero nagbunga ang pagsisikap niya kaya’t narating na rin niya ang kanyang ideal weight. Naging model nga siya ng Pantene at marami na ang nakapansin sa kanya hanggang kunin nga siya ng GMA 7 para sa Kung Mawawala Ka.

* * *

Si Gloria Diaz ang gumaganap na isa sa mga asawa ni Eddie Garcia sa Kung Mawawala Ka.

"Ay naku, hindi puwedeng mag-take two kay Direk Joel Lamangan," kwento niya. "Dapat parati kaming take-one. Kaya rehearsal muna bago ang take. Dyahi naman kung mati-take 2 ka."

Gloria has such great respect for Direk Joel dahil ayon sa kanya, ang multi-awarded na direktor ang tipo na nailalabas talaga ang the very best ng kanyang mga artista.

That night na kausap namin ang mga taga-Kung Mawawala Ka ang wish nga ni Gloria, nasa bahay siya para mapanood niya ang eksenang ikakasal na siya kay Eddie Gutierrez.

Isang linggo pa ang itatakbo ng second season at sa second week ng October ay third season na ang Kung Mawawala Ka. Salamat naman at na-maintain nila ang mataas na rating.

Sayang, marami pa sanang kwento si Gloria pero kailangan niyang umalis para sa taping ng Kool Ka Lang. Bago mag-disappear, nabanggit niyang excited siya sa gagawin niyang pelikula with Direk Celso Ad Castillo, ang remake ng Nympha.

Si Celso Kid ang direktor ng launching movie ng dating Miss Universe, Pinakamagandang Hayop Sa Balat Ng Lupa, kaya’t everytime na nakakatrabaho niya ang eccentric director, big event para sa kanya.