Pagkatapos makipag-meeting uli ni Alfie Lorenzo sa mga bossing ng ABS-CBN nitong nakaraang Biyernes ay na-finalize na rin ang Juday-Piolo movie na nagsisimula na rin nung Julu 28 o bago matapos ang buwang ito.
Nagkatotoo ang naging pahayag noon ni Tita Angge (Cornelia Lee) na posibleng magkaroon ng konting aberya ang unang shooting day ng pelikula nina Juday at Piolo pero pasasaan ba, tuloy-tuloy na ’yan. Ito rin ang nararamdaman noon ni Rene Mariano nang hilingan siya ng kanyang vibration para sa pangunahing tambalan ng bansa.
Samantala, "We are just friends," ang seryosong pahayag ni Judy Ann nang tanungin siya kung ano ang tunay na relasyon nila ni Piolo sa programa ni Inday Badiday sa DZMM. Maraming tagahanga ang nadismaya sa naging tugon ng kanilang idolo at isa na nga si Linda ng Batangas. Ayon sa kanya, bakit ayaw pa umamin ng kanyang idolo. Kitang-kita naman sa mga off-cam nila na higit pa sa magsyota ang kanilang kinikilos sa taping ng kanilang soap. Ayaw niyang dumating sa punto na matulad si Juday sa "The Boy Who Cried Wolf" na kung kailan nagsasabi ito ng katotohanan ay hindi na siya pinaniniwalaan.
Isang kasamahan namin sa loob ng booth ng DZMM, sa programa ni Inday Badiday ang nagwikang intindihin na lang ang aktres kung ayaw nitong umamin. Malaking aral ang natutunan nito sa naging relasyon nila ni Wowie de Guzman kaya napagdesisyunan nito na tatahimik siya sa parte ng kanyang buhay pag-ibig. — Alex Datu