Young star, obvious na nagi-ecstasy!

Ayaw naming maniwala na nagi-ecstasy ang sikat na aktres na ito kahit ayaw siyang tantanan ng mga intriga. May nagsabi noon na nabubulol daw ang magandang aktres at tinubuan pa ng maraming tagihawat sa mukha.

May nagsyete rin sa amin na naniniwala ang kasamahan niyang aktres na nagi-ecstasy ang young actress dahil minsan ay nakasama niya ito sa isang dressing room. Tingin nang tingin ang senior actress sa young star dahil habang nagba-blush-on ito ay talagang nanginginig ang kamay. Hindi naman gaanong malamig sa kuwarto.

Puno ng kontrobersya ang buhay ng sikat na young actress na ito na bida sa isang soap opera.

Angelika, Laging Nao-Ospital

Kalalabas lang ni Angelika dela Cruz sa St. Lukes Hospital kung saan nilagnat ito at idagdag pa ang sobrang pagod. Bukod sa taping ng Ikaw Lang Ang Mamahalin ay lagi pa itong may out-of-town shows.

Samantala, enjoy si Angelika sa bagong kabanata ng ILAM bilang kapareha ni Mark Anthony Fernandez. Maswerte nga ito dahil puro magagaling ang mga artistang kasama niya. Naiba ang role na ginampanan nito bilang isang babaeng nagkaroon ng amnesia kaya napahiwalay sa magulang at nobyo.

Nawala na sa eksena si Sherwin Ordoñez at nalulungkot nga ito (Sherwin) dahil hindi na niya makikita nang madalas si Angelika. Itinuwid ng aktres ang balitang nanliligaw sa kanya ang binata dahil para lang magkapatid ang turing nila sa isa’t isa. Isa pa, malaki ang respeto ni Sherwin sa aktres dahil kapag may problema ay si Angelika ang kanyang nasasandalan.

Alma-Michelle, Close Pa Rin

Sa presscon ng Kapalit ay tinanong ang seksing baguhang aktres na si Michelle Quizon kung ano ang masasabi nito kay Alma Moreno na kasama niya sa pelikula. "Close pa rin kami ni Tita Ness hanggang ngayon. Kahit noong may relasyon pa sila ni Lolo Dolphy ay magkaibigan na kami. Mabait kasi siya at never na nagbago," sey ni Michelle.

Sa said movie ay asawa ni Victor Neri si Alma pero ang minamahal nito ay si Michelle. Malaki ang pasasalamat ng dalawa at muli silang nagkita at nagkasama sa pelikula.

Tinitiyak ni Ness na magiging matagumpay na artista si Michelle dahil napaka-propesyonal nito at dedicated pa sa kanyang trabaho. Isa pa may talino ito sa pag-arte dahil nagmula sa angkan ng magagaling na artista.

Jay, Di Pantay-Pantay Ang Pagtingin Sa Mga Anak?

Nakakwentuhan namin si Jay Manalo na kasama rin sa pelikulang Kapalit. Naitanong namin sa magaling na aktor kung pantay-pantay ba ang pagtingin niya sa kanyang walong anak. Sinabi nito na kundi man siya naging mabuting asawa ay mabuti naman siyang ama. Kung makakasama lang nito ang lahat ng anak ay gusto niyang ipasyal ang mga ito at magkaroon ng sapat na panahon para sa kanila.

Ang kanyang ka-live-in ngayon ay isang estudyante na 21 years old. Sa rami ng kanyang commitment ngayon ay halos wala na itong pahinga. Nagtataka ito kung bakit marami pa rin ang kumukuha sa kanya kahit iniintrigang unpropesyonal siya. Tapos na ang syuting ng Prosti at balik-tambalan uli sila ni Joyce Jimenez sa Paraisong Parisukat.

Sa kabilang banda, saludo ang actor kay Alma Moreno. First time niyang gumanap ng martir na asawa ni Michelle Quizon.

Inamin din ni Jay na bata pa siya ay crush na niya si Alma. Lalo siyang humanga sa aktres nang magkasama sa pelikula dahil very professional ito at walang ere.

Vina, Ayaw Maging Kontrabida

Kahit walang pelikula si Vina Morales ay hindi naman ito nababakante sa mga shows sa loob at labas ng bansa.

May offer kay Vina para maging kontrabida sa isang soap opera pero hindi niya tinanggap dahil never niyang inisip na siya’y magiging malupit kahit sa telebisyon. Kung ang iba’y nag-shift na sa pagiging kontrabida ay hindi si Vina dahil pambida ang gusto niyang role na gampanan.

Aware rin ang magaling na singer-actress na nanlalamig ang mga tagahanga kapag naging kontrabida na ang isang artista na iniidolo nila.

Boyet, Nagbibigay Din Ng Bonus

Masugid kaming manonood ng Who Wants To Be a Millionaire hosted by Christopher de Leon. Nagtataka kami sa ibang contestant na sagot na lang nang sagot nang hindi inaanalisa ang bonus statement na ibinibigay nito. Halimbawa, kapag tinanong na ang contestant kung final answer na sa tanong ay sasagot naman ito ng final answer gayung sinasabi na ni Boyet na may dalawa pang natitirang lifeline. Ibig sabihin ay clue na ito na mali ang kanyang sagot. Pero hindi pa rin makuha ng contestant at pipiliting final answer na ito. Sayang lalo na kung paakyat na siya sa P200,000.00.