Ara Mina, willing magpa-drug test!

Tuloy pa rin ang paghuhubad ni Ara Mina. May offer siya sa Regal Films para sa pelikulang Paraisong Parisukat na remake ng movie nina Christopher de Leon at Alma Moreno. Sa bagong bersyon ay mas bold pa si Ara dahil ang kanyang direktor ay si Jose Javier Reyes na siyang nagdirek ng Toro. Hindi pa alam ni Ara kung sino ang magiging leading man niya.

Sa kabilang banda, hindi naman itinatanggi ni Ara na may nagyaya sa kanyang subukan ang paggamit ng ipinagbabawal na gamot pero never niyang ginawa. Kaya naman iniiwasan niyang pumunta sa mga lugar na pinupuntahan ng mga celebrities na gumigimik at gumagamit ng ecstasy. Sinabi pa rin niya na pabor siyang magpa-drug test ang mga artista para mapangalagaan ang kanilang pangalan at patunayan na hindi talaga sila gumagamit ng ipinagbabawal na gamot. Nadadamay kasi ang iba na hindi naman talaga tumitikim ng droga ayon pa sa aktres.

Nais din niyang ilabas na ng NBI (sakali ngang mayroon) ang listahan ng mga artistang gumagamit ng ipinagbabawal na gamot.

Samantala, first time ni Ara na gumanap na isang dancer sa Diskarte. Pakiramdam ni Ara, malaki ang naitulong ng That’s Entertainment para maging magaling siyang dancer.

James, Type Si Angelika

Gumanda nang husto ang career ni James Blanco dahil nabigyan siya ng pagkakataong maging isa sa mga bida ng soap opera na Ikaw Lang Ang Mamahalin. Kapareha niya si Angelika dela Cruz sa malaganap na teleseryeng ito na habang nagtatagal ay di inililihim ng aktor ang matindi niyang paghanga kay Angelika. Kaya nga kapag nakikitang sweet na sweet ito (Angelika) sa isa pa nitong kaparehong si Sherwin Ordoñez ay nagseselos din ang aktor. "Kahit sino man ay di mapipigilang ma-in love kay Angelika dahil ang ganda-ganda niya bukod pa sa pagiging mabait at malambing," aniya.

John, Ibinabahagi Ang Talino

Madalang kung gumawa ng pelikula si John Arcilla kaya natuwa siya nang i-offer ang Diskarte kung saan gaganap siya bilang isang pulis. Maigsi lang ang kanyang exposure rito pero sulit din dahil maganda naman ang papel na ginagampanan niya. Ayon sa aktor, may mga pulis na mababait pero napapabayaan kaya ang iba ay natutuksong maging corrupt.

Naka-concentrate pa rin siya sa paglabas sa entablado at ang mga natutunan niya sa teatro ay ibinabahagi niya sa iba lalo na roon sa mga nagnanais na maging stage actor o actress na siyang magiging daan para lumabas sa pelikula. Malaki ang naitulong ng entablado kaya naman naging multi-awarded actor si John —naging best actor siya sa pelikulang Mulanay at Ligaya Ang Itawag Mo Sa Akin.

Halle Berry Sa Isang Natatanging Pagganap

Pinarangalan na si Halle Berry bilang katangi-tangi at matalentong aktres kaya ilang award na ang natatanggap niya mula sa Emmy, Golden Globe, Screen Actors Guild at NAACP Image Award dahil sa di matatawarang pagganap sa Introducing Dorothy Dandrige. Ngayon ay ipapapamalas ulit ni Halle ang napakagaling na pag-arte sa Monster Ball, isang romantic drama kung saan natamo niya ang karangalan mula sa Oscars bilang best actress.

Sa pelikulang ito ay gagampanan ni Halle ang papel na Letecia, isang martir na babae kung saan ang asawa ay pinatay sa bilangguan. Sunud-sunod na trahedya ang nalasap nito gaya nang mabundol ng kotse ang anak na si Tyrell na ikinasawi rin ng buhay nito. Isang nagngangalang Hank ang tumulong sa kanya hanggang humantong ito sa kanilang pag-iibigan. Pero natuklasan ni Letecia na ito rin pala ang lalaking tumulong sa kamatayan ng asawa. Ano kaya ang iiral sa puso nito? Pag-ibig pa kaya o pagsuklam sa isang minamahal? Ito ang sasagutin ng pelikulang Monster Ball.

Blind Item: Sexy Actress Na Preggy, Namamalengke

Nakakapanghinayang ang nangyari sa career ng isang sikat na seksing aktres. Nawala na siya sa limelight sapul nang mabuntis at ngayon ay nagi-enjoy na lang sa pagiging simpleng maybahay.

May nakakita sa aktres na namamalengke sa isang pamilihan sa Cubao at hindi nahihiya kahit nakasuot ito ng maternity dress.Hindi niya ikinahihiya na malapit na siyang maging ina.

Naging pahulaan kung sino talaga ang ama ng sanggol na dinadala niya sa sinapupunan.

Dati na siyang bumabandera bilang pambatong bold actress ng isang major company bago siya nagdalantao.