Nora, may concert na naman

Dumating sa bansa during the Christmas Holidays ang international recording artist na si Jennifer Cuneta, na mas kilala ng kanyang mga kaibigan as ‘J Cee’, to promote her international album entitled "Dreaming of Love" na released locally ng Star Records. Unknown to many, si J Cee ay pamangkin sa pinsan ng megastar na si Sharon Cuneta although hindi pa nagkikita ang dalawa. Ang paternal grandfather ni J Cee at ang late father ni Sharon na si Mayor Pablo Cuneta ay magkapatid.

"Actualy, I’m a big fan of hers (Sharon). Sana magkita kami nang magkakilala naman kami nang husto," sabi pa ng New York based singer-composer.

Jennifer was born in the Philippines but her family moved to the big apple when she was 12.

When she was in town, gustung-gusto sana ni Jennifer na makapag-guest sa Sharon show pero hindi nagkaroon ng pagkakataon dahil bumalik na siya ng New York last Sunday, January 6 kasama ang kanyang guwapong boyfriend na si Enrique ‘Ricky’ Bernabe. Pero nangako si J Cee na babalik siya sa April. Naging fruitful ang kanyang two-week stay dahil naging abala siya hindi lamang sa promo ng kanyang album kundi nakapag-shopping siya nang husto na isa sa kanyang weaknesses.

Naging successful din ang launch ng kanyang album na ginanap sa Hard Rock Café at ng kanyang promo tour sa malls at sa iba’t ibang record outlets.

Bago ang Pilipinas, na-tap na ni J Cee ang US at European market sa kanyang pop/club hits tulad ng "Do It For Me" at "What You Do" at "Spirit of Man" at lahat ng mga awiting nabanggit ay pumasok sa Top 10 ng Billboard Club Play chart. Ang kanyang "Potion" ay pumasok sa UK Club Play Chart at ang kanyang "Now We Are Free" mula sa Gladiator Soundtrack which she recorded under Tommy Boy Records.

Ang album ni Jennifer Cuneta na pinamagatang "Dreaming of Love" ang first album released under Star Records International.

"Ngayong released na sa Pilipinas ang album ko, may reason na akong magpunta rito," aniya. "Aside from promoting my records, mabibisita ko pa ang mga relatives ko. Sana sa next visit ko in April ay makita ko na si (Tita) Sharon," asam pa niya.

* * *

Mukhang tuluy-tuloy na ang pagpalaot sa pagpapa-sexy ng dating That’s Entertainment member na si Maricar de Mesa matapos siyang ipareha kay Jomari Yllana sa pelikulang Katayan na sinundan ng Onsehan with Carlos Morales na dinirek ng ating katotong si Eugene Asis.

Sa pelikulang Buko Pandan na isinulat at dinirek ng box office director na si Uro dela Cruz for World Arts Cinema, kakaibang Maricar de Mesa ang mapapanood ng publiko, a more daring Maricar kung saan siya nakipagtagisan ng pagpapa-sexy kay Pyar Mirasol.

Ayon kay Maricar, hindi pa nga siya masyadong bumigay dito dahil hihintayin niya ang kanyang launching movie na sisimulan anyday soon na ididirek umano ng isang premyadong direktor.

"Kung solo movie ko, I don’t mind doing all out," aniya.

* * *

Sa kabila na hindi ang pelikulang Bagong Buwan ang nakakuha ng may pinakamaraming awards nung nakaraang awards night ng Metro Manila Film Festival, ito pa rin ang nanguna sa ten-day festival. Isang indikasyon na kung maganda ang pelikula, ito’y papasukin ng tao.

Dapat pa rin magpasalamat si Cesar Montano dahil sa kabila na disappointed siya (at ang mga taga Star Cinema) sa naging judgement ng mga jurors ng MMFF, ang pelikula naman niya ang pinaboran ng mga manonood kaya hindi na talaga dapat na nagpatutsada pa ang mister ni Sunshine Cruz nang kanyang tanggapin ang best actor trophy.

Saludo kami kay Cesar bilang aktor at ganundin kay Direk Marilou Diaz-Abaya, pero ang panlasa ng maraming tao ay magkakaiba.

* * *

Honored ang pop diva na si Kuh Ledesma dahil sa kauna-unahang pagkakataon ay naging guest niya ang superstar na si Nora Aunor sa kanyang fourth and final concert sa Music Museum last Saturday, January 5. Nag-duet sila ni Guy ng Habang May Buhay (ni Wency Cornejo) at sa kanyang solo numbers ay inawit naman ni Guy ang ilang popular theme songs ng pelikula to the delight ng audience.

Ang two-day concert ni Guy sa Music Museum last year at guesting niya sa concert ni Kuh ay siyang magiging signal ng isang major concert ng superstar sa kanyang kaarawan sa darating na Mayo 21 na ipu-produce ng Ace Entertainment na pinamumunuan nina Boy Palma at Nory Sayo na siya ring tumatayong musical director ni Guy.

Before the concert, ilalabas na rin ang bagong CD album ni Guy na malamang i-release thru Viva Records.

Ayon kay Boy Palma, marami umanong shows sa abroad si Guy simula sa July kaya tiyak daw na magiging super busy ang superstar sa taong ito.

* * *

<aster_amoyo@ dolphincall.co.jp>