Kilala sa lipunan ang mayamang bading na nauugnay kay Jay. At ang pagiging kalaguyo nga raw nito ang dahilan kung bakit marangya ang pamumuhay ngayon ng aktor.
"Iharap nila!" seryosong paghahamon ni Mr. Manalo.
"Nakakapikon na. Ang tagal na kasi nilang sinasabi ’yan na kesyo may gay lover daw ako. Na kahit hindi na ako magtrabaho ay sustentado naman daw ako. Eh, sino ba talaga ’yung taong ’yon na sinasabi nila? Kailangan ko pa ring pong magtrabaho. Kailangan ko pa ring gumawa ng pelikula. Hindi sarili ko lang ang binubuhay ko. Alam naman siguro nang lahat na may mga anak ako," dagdag na pahayag ng aktor.
Naging malaking kuwestyon din nga sa lahat ang magagarang sasakyan na ginagamit ngayon ni Jay na paiba-iba raw. At sabi nga, tanging mga sikat at mayayamang personalidad lang sa bansa ang puwedeng magkaroon.
"Yon po ay dahil sa pinasok ko na ang business ng buy and sell ng mga sasakyan. Hindi dahil sa bigay sa akin ’yon nang kung sino, kundi ibinebenta ko rin. Ang hirap kasi sa iba, masama agad ang naiisip.
"Gumawa lang naman ako ng ibang paraan na mapagkakakitaan. ’Di naman kasi, puwedeng dumipende lang sa pelikula. ’Yon ang parati kong sinasabi ’di ba nila maintindihan ’yon?
Samantala, hindi naman nagsalita nang patapos si Jay sakaling magkatotoo ang mga akusasyon sa kanya ngayon na magkaroon nga siya ng kabit na mayamang bakla sa kabila ng kahirapan ng buhay ngayon. (Ulat ni Robert Perez)